Қызылорда облысы, Жаңақорған ауданының тұрғыны Сандуғаш Турлыбекова қоғамдық көлікпен ауруханаға бара жатады. Алайда келіншек мінген көлікті жолда полиция қызметкерлері тоқтатып, ары қарай жүруіне тиым салады. Діттеген жеріне көлікпен жете алмаған келіншек ашуға булығып, әлеуметтік желіде видео жариялайды. Оның айтуынша, жолдардың жабылуына облыс әкімі Г.Әбдіхалықованың сапары себеп болған.
Жарты жолда көліктен түсіп, ауруханаға жаяу тартқан келіншек, полиция қызметкерлерінен жолдың жабылу себебін сұрайды.
— Әкім келе жатыр! Жолды жабу керек! , — деген қағазыңызды көрсетіңізші маған? Көрсетіңіз қағазды. Міне, өткізбейді. Милиция қойып қойған. Әкім немене ханның қызы ма еді? Ол да халық қой.Бізде халықпыз. Ол да адам, біз де адамбыз. Бәрі бірдей болу керек, жолдың бәрін жаппай, – деп ашынды желі қолданушысы.
Ашуы тарқамаған азаматша, облыс әкімін алдынан күтіп алып, жолды не себепті жапқызғанын сұрады. Бірақ Гүлшара Әбдіхалықова бұл жайында тапсырма берілмегенін айтып, қысқа қайырды. Өңір басшысын сұрақтың астына алған Сандуғаш Тұрлыбекова «Сіз ханның қызысыз ба? Неге жолды жаптырасыз?» — деп ренішін жасырмады.
Осы жағдайға қатысты Г.Әбдіхалықова көп кешікпей әлеуметтік желіде ресми мәлімдеме жасады.
— Мен және аудан әкімі жолды жабу туралы ешқандай тапсырма берген жоқпыз. Сол жердегі ішкі істер бөлімнің басшысы да ондай тапсырма берілген жоқ деп айтып отыр. Егер сол жердегі учаскелік полицияның шешімі болса, департамент бастығы тарапынан қызметтік қарау болады, — деді Г.Әбдіхалықова.
Бүгін Қызылорда облысының әкімі Г.Әбдіхалықова іс-сапармен Жаңақорған, Шиелі аудандарына барып, ауруханалардың жағдайымен танысып қайтқан болатын.
