Ш. Қалдаяқов атындағы облыстық филармонияның «Сүгір» атындағы қазақ ұлт-аспаптар оркестрі дәстүрлі фестивалге дайындықты бастап кетті. Өнер ұжымы түрлі аспапта ойнайтын балалармен бірге бір сахнада өнер көрсетеді. Әдеттегідей Фестиваль аясында мектеп оқушылары «Сүгір» атындағы қазақ ұлттық-аспаптар оркестірінің сүйемелдеуімен халық әндері мен бүгінгі күні көпшіліктің көзайымына айналған туындыларды шырқайды деп күтілуде. Оған қоса домбыра, жетіген саз сырнаймен қосылып күй тартады. Жоба аясында көрермен қошеметіне бөленетін балалардың музыкаға деген махаббаты одан сайын артып, шарадан мол шабыт алады дейді мамандар. Дәстүрлі фестиваль өнерлі балалардың биік шыңнан көрінуіне септігін тигізері анық.
Айта кетсек, Ш. Қалдаяқов атындағы облыстық филармонияның «Сүгір» атындағы қазақ ұлт-аспапатар оркестрі 2002 жылы құрылған. 2008 жылы облыстық ғылыми тәжірибелік конференцияда профессор Өтеген Ғұбайдулиннің ұсынысымен оркестрге дәулескер күйші-композитор, шертпе күйдің шебері Сүгір Әліұлының есімі берілген.Шәмші Қалдаяқов атындағы облыстық филармонияның «Сүгір» атындағы қазақ ұлт аспаптар оркестрінің құрамында 50- ге жуық әртіс жұмыс жасауда. Оркестрдің бас дирижері халықаралық, республикалық байқаулардың лауреаты — Ерлан Дәуренбеков. Бірқатар халықаралық додада топ жарып, облыстың атын әлемге танытып жүрген оркестрдің бас дирижері оркестрдің шығармашылық жаңалығымен бөлісті.
Оркестр, репертуарында халық әндері мен күйлері, әлем және қазақ композиторларының, сондай-ақ жергілікті композиторлардың еңбектерінен құралған 500-ге жуық шығармалары бар. Оркестрдің көркемдік жетекшісі «Мәдениет саласының үздігі» төсбелгісінің иегері Қонысбеков Өмірбек Әлімбекұлы.
Адамның дүниемен қарым-қатынасының негізінде музыка жатыр. Бармағынан бал тамған күйшідей жүрегіміздің нәзік қылын шерте отырып музыка бізге басқа адамдармен де эмоциялық байланыс орнатуға мүмкіндік береді. Үлкен қалада жанға шипа болар музыканың көзін табу қиын-ақ. Кейде тіпті, музыканттар мен әншілердің өнерін тамашалауға болатын жалғыз жер — филармония болады. Түркістан облыстық филармониясы еліміздегі ең көне өнер ордасының бірі. Ол Шымкент қаласында орналасқан, осы жерде 1930 жылы ашылған. 1996 жылы оған осы өңірден шыққан композитор Шәмші Қалдаяқовтың аты берілген. Он бір жыл бұрын осы шағын да жайлы ғимаратты ескісінің орнына тұрғызған.Бүгінгі таңда филармония ұжымын Құрманғазы атындағы Қазақ Ұлттық Консерваториясының түлегі, көптеген күйлердің авторы, композитор, «Мәдениет саласының үздігі» төсбелгісінің иегері Бейсеқожаев Нұрсат Саттарұлы басқарып келеді. Өнер ордасының мақсаты мәдениет саласындағы мемлекеттік идеологиялық саясатты енгізу бағытында сахналық, концерттік іс-шаралар, қайырымдылық концерттер, жастар мен жасөспірімдер арасында музыкалық лекция концерттер ұйымдастыра отырып, осы заманғы ұлттық мәдениет, фольклор, салт-дәстүр, әлемдік классикалық шығармаларды насихаттау және дәріптеу болып табылады.
