Бүгінде облыстық филармония құрамында 3 жылдан бері өнер көрсетіп жүрген “Яссы” би ансамблі “Жеті қазына” телевизиялық жобасының финалына дайындықты жүргізуде. Астанада өтетін жобада ұлттық өнер дәріптеліп, салт-дәстүріміз салтанат құруда. Қалың көпшілік көк жәшік арқылы бір жарым сағат бойы қазақтың құндылығына қанығуға мүмкіндік алып отыр. «Яссы» би ансамблі енді финалда ұлттық нақыштағы биді көрсетеміз деп отыр. Енді ғана, тәй-тәй басып келе жатқан би ұжымы жеңістен үмітті.
Филармония құрамында қазақтың фольклорлық және өзге де елдердің билерін сахнада кәсіби орындап жүрген «Яссы» би ансамблінің репертуарында 20-ға жуық нөмір бар. Бүгінде олар көрерменге бірқатар жеке концертін беріп те үлгерген.
Бұдан өзге облыстық филармонияда “Фараб” би ансамблі де көрерменге өз өнерін көрсетіп, ел алғысына бөленіп жүр. Өнер ұжымы Түркістан облысында өтетін барлық мәдени шараға қатысады.
Филармония — түрлі өнер тоғысқан конглометрат. Сүгір атындағы ұлт аспаптар оркестрі, «Яссы» және «Фараб» би ансмабльдері, орыс аспаптары, скрипкашылар ансамблі, солистер ұжымы — барлығы 200 ден астам әртіс өнер көрсетуде. Сонымен қатар филармонияда ҚР еңбек сіңірген әртісі Құрманбай Шойынбаев, ҚР еңбегі сіңген қызметкері Нышан Төлегенов, ҚР Еңбек сіңірген қайраткері Сәбира Әбдірайымова, ҚР Мәдениет қайраткерлері Гүлбала Әбуова, Айжан Тәженова, Сүндет Миралиев, «Мәдениет саласының үздігі» төсбелгісінің иегерлері Айнұр Әбілдаева және 30 — дан астам Халықаралық байқаулардың лауреаттары эстрадалық және дәстүрлі әншілер қызмет атқарады. Эстрадалық және дәстүрлі әншілер ұжымы жаңа бағытта жұмыс істеуді де қолға алған.
Облыстық филармония ұжымының қатарында дәстүрлі әнді дәріптеп жүрген өнерпаздар көп. Мәдени мекемеде 40 жылдан астамеңбек еткен, ҚР еңбегі сіңген қызметкері Нышан Төлегенов ұлттық әнді дәріптеп келеді. Сөзінше қазір көрермен қазақтың ұлттық дәстүрлі әндерін тыңдауға құштар.
