Сайлау нәтижесі реформалардың жалғасатынын, Қасым-Жомарт Тоқаев жариялаған бастамалардың жүзеге асатынын білдіреді. Бұл туралы Президент жанындағы Қазақстан стратегиялық зерттеулер институты директорының орынбасары Алуа Жолдыбалина айтты.
«Биылғы сайлау Қазақстанның саяси жүйесін толығымен қайта құру жолындағы шешуші қадам болғаны сөзсіз. Сайлау бойынша жасалған алдын ала қорытындылар мен экзит-пулл мәліметтері қазірдің өзінде тиісті нәтижені шығаруға мүмкіндік береді. Сайлау науқаны демократиялық нормаларға сай өтті», — деді А.Жолдыбаева «ҚСЗИ GPS» сараптамалық алаңы отырысында.
Осы орайда ол жаңа президенттік мандат референдумнан кейін өкілеттіктері жағынан айтарлықтай қысқарғанын еске салды. Мемлекет басшысы қазіргі кезде де, болашақта да биліктің монополиялануына жол бермеу мақсатында кезектен тыс сайлау өткізу және бір реттік президенттік мерзімді бекіту қадамына барды.
А.Жолдыбалина ел халқы Мемлекет басшысына тағы да сенім білдіріп, сайлаушылардың басым бөлігі Қасым-Жомарт Тоқаевқа дауыс бергенін айтты.
Сарапшының пайымынша, сайлау нәтижесі реформалардың жалғасатынын, Қасым-Жомарт Тоқаев жариялаған бастамалардың жүзеге асатынын білдіреді. Келесі жеті жылда экономиканы монополиясыздандыру және саяси институттарды, әсіресе, жергілікті деңгейде нығайту бойынша қадамдар қамтылмақ.
Сонымен қатар биылғы сайлауда байқаушылар ерекше белсенділік танытқанын жеткізді.
«Ел халқының да белсендігі жоғары деңгейде. Мемлекет басшысының әрбір әрекеті қоғамның жіті назарында тұрғанын айтқан жөн. Сайлау қорытындысы қоғамда әділдікке, бәсекеге қабілеттілікке және нақты нәтижелерге сұраныстың бар екенін көрсетті», — деді институт өкілі.
