18 қарашада Түркістан қаласының құрметті азаматы Әліпбек Шәріпбекұлы Өсербаевты еске алуға арналған суға жүзуден республикалық турнир басталды. Турнирге Түркістан өңірінің спортшылары мен Шымкент, Қызылорда, Тараз қалаларынан келген дарынды саңлақтар күш сынасуда.
Су айдынында 150 спортшы жарыс жолына шығып, бақтарын сынауда. Келешекте еліміздің көк байрағын талай әлемдік додаларда желбіретуді мақсат еткен Сәулет Рахманберді бұл жарысқа жоғары дайындықпен келгенін айтады. Ол бұл турнирде 50 метр брасс әдісімен бас жүлде иеленіп, алтын медаль жеңіп алды.
Жарыстың ашылу салтанатына арнайы келген Түркістан қаласы әкімі орынбасары Байдулла Оразбеков пен облыстық дене шынықтыру және спорт басқармасы басшысының орынбасары Айдос Қалтаев сөз сөйлеп, жастарға сәттілік тіледі. Екі күнге созылатын жарыс Түркістанда әлемдік аренаға алып шығар орталық су спорт кешенінде аса тартысты өтіп жатыр. Кешеннің директоры Ғалымжан Хұдияров та жарыстың маңыздылығына тоқталды.
Сайыстың бас төрешісі Нұрлыхан Көшербаевтың айтуынша, спортшылар жүзудің еркін, шалқалай, брасс әдісі, батрфляин әдісі, кешенді жүзу бойынша сынға түседі. Тартысты додаға 2008-2009, 2010 және одан кіші жасөспірімдер қатысуда. Республикалық жарыста Түркістан облысының намысын талантты жерлестеріміз Айша Хайдарова, Балауса Рахматулла, Ардақ Қожахмет, Аянат Бостан, Арзу Рахимжанова сынды өрендер қорғауда.
Соңғы жылдары Түркістанда су спорты дамып келеді. Бұған қаламызда Түркістан су спорт кешенінің ашылуы басты себеп болды. 2014 жылдан бастап Түркістан су спорт кешенінің құрылысы аяқталған соң «Оңтүстік Қазақстан облысының Әбдісалан Нұрмаханов атындағы олимпиада резервінің мамандандырылған балалар мен жасөспірімдер спорт мектебі коммуналдық мемлекеттік мекемесінің» балансына өткізіліп атауы өзгертілді. Түркістан облысы әкімдігінің №267 27.11.2019 жылғы қаулысымен өз алдына Түркістан облысы дене шынықтыру және спорт басқармасының «Орталық су-спорт кешені» мемлекеттік коммуналдық қазыналық кәсіпорны құрылды.
