Келес ауданы әкімі аппаратының ұйымдастыру және мемлекеттік қызмет көрсету мониторингі бөлімшесімен Келес ауданы, Абай ауылындағы «Халыққа қызмет көрсету орталығында» және «Халықтық кеңседе» аудан тұрғындарына қызмет көрсету сапасына қатысты зерделеу жұмыстары жүргізілді.
Қоғамдық бақылау барысында, «Халыққа қызмет көрсету орталығы» және «Халықтық кеңсе» тарапынан мүмкіндігі шектеулі жандар үшін жасалған жағдайы, қызмет алушыларға арналған қабылдаудың сапалы ұйымдастырылуы, өзіне-өзі қызмет көрсету бұрышы және т.б. мәселелер қаралып, нәтижесінде бірқатар ұсыныстар мен ескертпелер берілді.
Атап айтқанда, мүмкіндігі шектеулі жандар үшін жағдай жасау, «Халық үніне құлақ асатын мемлекет» тұжырымдамасына сәйкес жұмыс істеу, мемлекеттік қызметтер көрсету саласындағы өзекті мәселелерге көбірек көңіл бөлу, азаматтардың өтініштеріне уақытылы және сапалы қызмет көрсету тапсырылды. Бұл ретте, мемлекеттік қызмет сапасын арттыру мақсатында азаматтардың қызмет алудағы кезегін ұзақ күтуін мүлдем болдырмау және электрондық кезекті тиісті деңгейде ұйымдастыру қажеттігі ұсынылды.
Алдағы уақытта мемлекеттік қызмет көрсетуші мекемелерге тұрақты түрде қоғамдық бақылау жұмыстары жүргізілетін болады.
Айта кетсек, Цифрлық даму, инновациялар және аэроғарыш өнеркәсібі министрі Бағдат Мусинге «Азаматтарға арналған үкімет» жұмысшыларынан жалақыға қатысты біраз өтініштер түскен.
«Өткен демалыста «Азаматтарға арналған үкімет» басшылығымен осы жайтты талқыладым. Адил Кожиховқа барлық аймақтардан жұмысшыларды тарта отырып, жалақыны арттыру бойынша жоспар құруды және жалпы еңбекақы мен сыйақы жүйесін қайта қарауды тапсырдым. Еңбекақының жаңа жүйесін облыстағы ұжымдармен біріге отырып жасау маңызды! 5 жылдан бері жалақысы түк өзгермеген қызметкерлер категориясы да бар. Осы мәселені жылдам жөндеу қажет», – деп жазды министр әлеуметтік желіде. Оның айтуынша, алдағы наурызда жұмысшылар мен олардың отбасылары оң өзгерістерді сезінуі тиіс.
