Арыстықтар күз-көктемде тал егуді әдетке айналдыруда. Қазан-қараша айынан бері Арыс қаласында өтіп жатқан сенбіліктер мен жаңа отырғызылған тал-дарақтар соның дәлелі. Бүгінде Арыс қаласында орналасқан «Жасыл-Арыс» КММ-нің мамандары Жер анаға желектен жүзік тағып, қаланың жасылға орануына үлес қосуда.
Бұл жолғы экологиялық акция Арыс – Шардара айналма жол бойында жалғасты. Мамандардың бір бөлігі ағаш отырғызатын орынды дайындап, мәре-сәре болып жатса, екінші топ жерге тігілген жас шыбықтарды суарып, бұрынырақ отырғызылған талдардың түбін қопсытып, діңін әктеп жатты. Мамандардың айтуынша, тіршілік көзі тал тамырына жетіп тұрса, жаз шыққанша жайнап шығуы тиіс.
Игі шара тек қала көлемінде ғана емес, ауылдық округтерде, мекеме-мектеп аулаларында да жалғасуда. Қала әкімі Гүлжан Құрманбекова шаһарды көгалдандыру мен абаттандыру ісіне ерекше назар аударып келеді. Бүгінгі таңда өз үйі іргесін, тұрғылықты көшесін абаттандырамын деген арыстық тұрғындарға әкімдік тарапынан көшеттер де үлестірілуде.
Жалпы, жоспар бойынша биылғы күзгі ағаш отырғызу маусымына Арыс қаласы мен ауылдық округ аумағында 25000 көшет отырғызу жоспарланып, жұмыс жүріп жатыр.
Айта кетейік, облыс әкімі Дархан Сатыбалды Түркістан облысына қарасты барлық аудандар мен ауылдарды жасыл желекке айналдыруға тапсырма берген еді. Осыған орай Түркістан облысы Табиғи ресурстар және табиғат пайдалануды реттеу басқармасына қарасты Орман шаруашылығы коммуналдық мемлекеттік мекемелерінің тұқымбақтарында өсірілген ағаш көшеттері қарастырылып, егілуде. Оның ішінде қарағаш, үйеңкі, шаған, айлант, акация, туя, арша, шынар және тағы басқа ағаштар бар.
Сенбілік – қоршаған ортаны қоқыс қалдықтарынан тазартып, ағаш көшеттерін отырғызып халықты ауызбіршілікке шақыратын игілікті іс. Қаламызды көгалдандыру, таза қалаға айналдыру – қала әкімі Гүлжан Құрманбекованың басты назарында.Жуырда ғана «Парасат» пікірталас клубының отырысында сөз сөйлеген қала әкімі бабаларымыз Әз-Наурыз келгенде бұлақтың көзін ашып, ағаш отырғызуды дәстүрге айналдырғанын атап өткен. — Туған жерді және оның табиғатын қадірлеу — азаматтық парызымыз десек, өзіміз тұратын ауламызға тал егіп, туып-өскен аймағымызды көгалдандыру өмір салтына айналуы тиіс деп білемін. Қаламызды көгалдандыру, тазалығын сақтау жұмыстарына Арыс халқын белсене араласуға шақырамын, — деген болатын Гүлжан Мамытқызы.Осы ретте бүгін қала және ауылдық округтерде санитарлық тазалық іс-шарасы өтті. Оған әкімдік қызметкерлері, мемлекеттік мекемелер, кәсіпорын ұжымдары мен қала тұрғындары бір кісідей атсалысып, өз аумақтарында тазарту жұмыстарын жүргізіп, тал отырғызды.Сенбілікте қаламызда орналасқан барлық мекемелер мен бөлімдер өздеріне бекітілген көшелерді тұрмыстық қалдықтардан тазартты. Игі шара барысында жол жиектері және арық жүйелері қатты қалдықтардан, арам шөптерден тазартылып, арнайы техникалардың көмегімен бірнеше тонна қоқыс шығарылды.Жалпы, 3000 мыңнан астам жерлесіміз қатысқан сенбілікте 7 200-ге жуық ағаш көшеттері отырғызылды.