Түркістан облысының Төлеби ауданында балаларға арналған ат спорты үйірмесіне сұраныс артуда. Жеткіншектер үйірмеге тегін қатысады. Облыстық ұлттық спорт түрлері мектебінің мамандары ат құмар жеткіншектерге аударыспақтың қыр-сырын үйретеді. Бұл әсіресе қалалы жерде тұратын балалардың жазғы демалысын ауылда өткізіп, ұлттық ойындарға қанығып өсуіне сеп болып отыр.
Түймебек Жұмалиев — аударыспақтан еліміздің және Азияның бірнеше дүркін чемпионы. Білікті бапкер балаларға ат үстінде күресудің айла-тәсілдерін үйретуде. Егер иекемі бар бала болса, өзі жаттықтырушы болып жұмыс істейтін облыстық ұлттық спорт түрлері мектебіне шақырады. Бекзат пен Арманның атқа қызығушылығы жоғары. Қазір аударыспақтың қыр-сырын әбден меңгеріп алған.
— Аударыспақта білегің мықты боу керек. Тізені тірей білу керек. Ат үстінде отыра білу керек. Ең бастысы жүрек болу керек. «Атқа сенсең ол да саған сенеді», демекші атқа жақсы қарай білу керек .
— Аударыспақ аттың үстінде отырған маған ұнайды. Білекті, жүректі болсаң жеңіеске жетесің. Аттың үсінде бекем отыру керек, белді болу керек. Ағаларыма қарап, ағаралыма қызығып осы спортқа келдім,- дейді тұрғындар.
Табиғаты тамаша Төлеби ауданының Қаратөбе ауылында өтетін жаттығуға ауыл балаларынан бөлек, Шымкент пен Леңгір қаласынан да жеткіншектер келіп қатысады. Бұл біріншіден балалардың жазғы демалысын тиімді өткізіп, салауатты өмір салтын ұстануына сеп болса, екіншіден ұлттық ойындарды насихаттап, жас ұрпақтың бойына сіңірудің бір жолы. Мамандар ұлттық спорт ойындарына жасөспірімдердің қызығушылығы жоғары екенін айтады.
— Жасөспірімдердің ұлттық спорт – аударыспаққа өте қызығушылығы жоғары. Оқушылар көп келеді. Әр тренердің өз оқушылары бар. Оларды дайындаймыз. Аударыспаққа білектің, белдің күші мықты болу керек. Әдіс-айла, ойдағыдай жаттығу болу керек. Далада атпен жаттығу жасатамыз. Тер төксең мықты боласың,- дейді ОБЛЫСТЫҚ ҰЛТТЫҚ СПОРТ ТҮРЛЕРІ МЕКТЕБІНІҢ ЖАТТЫҚТЫРУШЫСЫ ТҮЙМЕБЕК ЖҰМАЛИЕВ.
Түркістан облысында балаларды ұлттық ойын түрлеріне баулитын екі спорт мектебі бар. Оның бірі — Шымкент қаласында, екіншісі — Түлкібас ауданында орналасқан. Онда спорттың он түрі бойынша мыңға жуық жасөспірім жаттығады.
