Биыл қазақ әдебиеті мен журналистика саласында өшпес із қалдырған белгілі қаламгер Шерхан Мұртазаның туғанына 90 жыл толып отыр. Осыған орай Қазығұрт аудандық орталықтандырылған кітапханалар жүйесіне қарасты Үшбұлақ ауылдық кітапханасында «Қабырғалы қаламгер» атты әдеби суаре өткізілді. Іс-шараның мақсаты — қазақтың қабырғалы қаламгері, қаламы қарымды журналисті, қоғам қайраткері Шерхан Мұртазаның ел мүддесі үшін атқарған еңбегі, әдебиет саласында қалдырған мол мұрасын насихаттау. Іс-шарада оқырмандар көркемсөз шеберінің өміріне, шығармашылығына қатысты қызықты деректерді ортаға салып, өзара ой бөлісті.
Кітап – адам жанының рухани азығы. Кітап оқыған сайын оқырманның ынтасы мен зейіні арта түсері анық. Кітап оқу – адам психологиясын сергітіп, рухани дамуға көмектеседі. Білімді толықтырып, ойлау жүйесін дамытады. Бүгінде Қазығұрт аудандық орталықтандырылған кітапханалар жүйесіне қарасты Көкібел ауылдық кітапханасында оқырмандарды кітап оқуға шақыру, жаңа әдебиеттермен таныстыру мақсатында «Жаңа кітап — жан азығы» атты кітап көрмесін ұйымдастырып, жаңадан түскен әдебиеттерге шолу жасады.
Сонымен қатар, Қазығұрт аудандық орталықтандырылған кітапханалар жүйесіне қарасты Қарабау ауылдық кітапханасында “Бақытты балалық шақ” атты инфо-сағат болып өтті. Іс-шараның мақсаты – жас ұрпақты есірткі мен психотроптық заттарды, алкогольді қолданудың зияны туралы хабардар ету, салауатты өмір салтын насихаттау және рухани-адамгершілік құндылықтарды жаңғырту. Өскелең ұрпақты спорт және туризммен белсенді айналысуға шақыру, сондай-ақ, жастардың санасында есірткіге қарсы иммунитетті қалыптастыру.
Аудандағы рухани мекенде мәдени шара мұнымен аяқталмады. Қ.Өмірәлиев атындағы аудандық орталық кітапханасында ақын, ойшыл, ғалым, мемлекет қайраткері Жүсіп Хас Хажиб Баласағұнидің өмір тарихы, нақыл сөздері мен дастандарын оқырмандарға кеңінен насихаттау мақсатында «Ұлы даланың ұлы тұлғасы» атты тұлға сағаты өткізілді.
