Бізде соңғы кезде жаман әдет пайда болды. Сәл бір жаман нәрсе болса болды әкімді кінәлап шығамыз. Бүгінгі пандемияға қатысты айтамын да. Оған Шымкент қаласының әкімі Мұрат Әйтенов қаншалықты кінәлі? Бұл әлемдік пандемия. Еуропаның өркениеттің шыңына шыққан елдері де індетке қарсы төтеп бере алмай жатқан жоқ па?!
Несін жасырамыз, бүгінгі жағдай әкімнің жұмысына көлеңке түсіргені болмаса, оның іскерлігіне жалпы жұрт риза деп ойлаймын. Әйтенов тізгінді қолға алғалы қаланың құрылысына қан жүгірді. Өздеріңіз де күнделікті куә шығарсыздар. Қаланың қай бұрышына барсаң да жөнделіп жатқан жолдар, басқа құрылыстар алдыңнан шығады.
«Өз өзіңе бекем бол көршіңді ұры тұтпа» дейді. Сол айтпақшы сіз бен біздің ауырып қалмауымыз ең әуелі әкімге емес, тікелей өзімізге байланысты. Ешқандай санитарлық норманы сақтамасақ инфекция өршімей қайтеді, ойлаңыздаршы. Қарапайым масканың өзін халық түгел тақпай жатқан жоқ па?
«Көш жүре түзеледі» демекші, пандемиямен қалай күресуді, өзімізді қалай ұстауды енді үйреніп келе жатырмыз. Рас, басында үрей болды, өзіміз де не болғанын түсінбей қалдық. Бұрын соңды мұндай пәлеге кім ұшырап көріпті. Сондықтан басшылыққа күйе жаға бермей, сабырға келейік, осы кезде ынтымағымызды көрсетпегенде қашан көрсетеміз. Күндіз-түні шапқылап оларға да оңай емес. Жұрт осылай қиналып жатқанда әкімнің ұйқысы тыныш деп ойлайсыздар ма?!
Ауруханалық төсек-орын мәселесі шешімін тауып жатыр. Дәрі-дәрмектің проблемасы да шешіліп қалады, Құдай қаласа. Пандемия басталғанда азық-түлікпен де осындай дүрбелең болған еді, естеріңізде ме?! Ендеше кеше ғана әкім қызметіне кіріскен Мұрат Дүйсенбекұлына қолдау білдіріп, қайта түйткілді мәселелердің түйінін тарқатуға өз ұсыныс, идеямызды айтып, көмектесейік ағайын!
