Түркістан облысында Президент сайлауына қатысты тұрғындардан түскен сауалдарға «109» CALL-орталығы тарапынан жедел әрі тиянақты жауап беріледі. Бұл туралы облыстық цифрландыру, мемлекеттік қызметтер көрсету және архивтер басқармасы мәлім етті.
«Қазіргі таңда «109» CALL-орталығына орташа есеппен күніне 150-200 қоңырауға дейін қабылданады. Кезектен тыс Президенттік сайлау бойынша аудандардан ақпарат алу мақсатында 40-45 қоңырау түседі. Бұл ретте, тұрғындарға https://tur.saylaw.kz сайты арқылы ЖСН нөмірімен тексеріп, немесе мекен-жайы бойынша қандай сайлау учаскесіне қарайтыны туралы ақпарат беріліп жатыр», — деді басқарма басшысы Елнұр Өтебаев.
Еске сала кетсек, Түркістан облысының әкімдігі тарапынан тұрғындарды тиісті ақпаратпен қамтамасыз ету мақсатында облыс әкімдігінің qov.kz ресми интернет-ресурсы жұмыс істейді.
Сайлау учаскесі туралы қажетті ақпаратты Telegram мессенджеріндегі арнайы бот арқылы да білуге болады. Сонымен қатар, қосымша сұрақтар болған жағдайда 109 Call-орталығы кез келген уақытта тәулік бойы сізге ақпарат береді.
Айта кетейік, сайлау алдындағы үгіт-насихат жұмысы 21 қазан мен 18 қараша аралығында өтеді. Үгіт жүргізу 18 қараша күні сағат 18:00-де тоқтатылады. 19 қараша — сайлау алдындағы тыныштық күні, ал 20 қараша — дауыс беру күні. Сайлау 20 қараша күні таңғы сағат 07:00-де басталып, 20:00-ге дейін жалғасады.
