Түркістан облысы Бәйдібек ауданының орталығындағы спорт кешенінде Қазақстан Республикасына еңбек сіңірген жаттықтырушы, қазақ күресінен спорт шебері Темір Шубайұлын еске алуға арналған дзюдодан жасөспірімдер арасындағы IV халықаралық турнир өтіп жатыр.
Дзюдошылар бәсекесіне Алматы қаласы, Қызылорда облысы, Өзбекстан Республикасынан келген 20-ға жуық команда, 300-ге жуық спортшы қатысуда.
Татами төріндегі балуандар белдесуінде 8 салмақ дәрежесінде ұлдар жарыс көрігін қыздырса, 8 салмақ дәрежесінде қыздар өзара бақ сынауда. Жарыс жеңімпаздары бүгін белгілі болады. Байрақты бәсекені жоғары дәрежеде ұйымдастыруға Бәйдібек ауданы әкімдігі мен Түркістан облысының №3 олимпиада резервінің мамандандырылған балалар мен жасөспірімдер спорт мектебі мұрындық болды.
Дүбірлі дода Қазақстан Республикасына еңбек сіңірген жаттықтырушы, қазақ күресінен спорт шебері Темір Шубайұлын еске алуға арналған.
Айтулы додаға негізінен 2006-2007 жылы туылған жасөспірім дзюдошылар келіп, бақтарын сынауда. Татами төріндебілекті де жүректі балуандар белдесіп, бар өнерлерін ортаға салуда. Дәстүрлі түрде жыл сайын жалғасын тауып келе жатқан сайыстың ашылу салтанатында Бәйдібек ауданының әкімі Ержігіт Шәріпбекұлы жарысқа қатысушы қонақтар мен спортшыларға сәттілік тілеп, мықтылардың жеңіске жетуін тіледі. Сонымен қатар, Темір Шубайұлының шәкірттері Түркістан облысының олимпиада резервін даярлау орталығының директоры Нұран Айтбеков пен Қазақстан Республикасының бокс федерациясының атқарушы директоры Марат Мықтыбеков осындай жарыстардың өңірде көптеп өтуі ауыл жастарына дем береді деп, сенім білдірді.
Бұл сайыста 55 келі салмақта өзінің шеберлігімен көзге түсіп жатқан Жамбыл облысының саңлағы Тыныс Ұлан жеңіс үшін келгенін айтып, алдағы жоспарымен бөлісті.
