Түркістан облысының әкімі Дархан Сатыбалды Төлеби ауданына іс-сапары барысында балмұздақ цехының жұмысымен танысты. Мамандардың сөзінше жуырда өндіріс орнына су жаңа Австриялық құрал – жабдық орнатылмақ. Кәсіпорында балмұздақ, шоколад, тұшпара өнімдері де шығарылады. Сондай-ақ өңір басшысының назарына ауданда өндірілетін өзге де отандық өнім көрмесі де ұсынылды.
Бірінші Мамыр ауылдық округінде орналасқан балмұздақ цехы 1998 жылдан бері жұмыс істейді. Кәсіпорын жылына 3 мың тоннаға жуық балмұздақ, 15 тонна тұшпара, жарты миллион тоннадан астам шоколад өнімін өндіреді. Кәсіпорында 200-ге жуық адам тұрақты жұмыспен қамтылған. Ал келер жылы өндіріс орны су жаңа австриялық құрал – жабдықпен қамтылады. Нәтижесінде шығарылатын өнім көлемі артады.
Сондай-ақ төлебиліктер ауданда өндірілетін тауар көрмесін де ұйымдастырды. Облыс әкімі шара барысында азық-түліктен бастап, аяқ киім және өзгеде өнімдермен танысып, кәсіпкерлермен тілдесті.
Айта кетсек, бүгінде Төлеби ауданында кәсіпкерлік саласында жұмыс істеп тұрған субъектілер саны 8 мыңға жуықтаған. Ал шағын және орта бизнесті дамыту үшін жыл басынан бері жеке азаматтарға 3 млрд. 921 млн теңгенің несиесі беріліпті.
«Бизнестің жол картасы-2025» бизнесті қолдау мен дамытудың мемлекеттік бағдарламасы шеңберінде іріктеуден 2 жоба өткен. Енді бұл бизнес жоспарлар жыл соңына дейін «Даму» қоры арқылы қаржыландырылып, іске асады.
«Балмұздақ» ЖШС-і алғаш рет 6 млн. 130 мың теңге тұратын 8746 кг көлеміндегі өнімінің алғашқы партиясын экспортқа шығарды. Өнім партиясы – Өзбекстан еліне жіберілді.
«Балмұздақ» ЖШС-і ұдайы заман талабына сай озық технологияларды ендіріп, балмұздақ өндірісі үшін қажетті барлық шикізатпен қамтамасыз етілген, арнайы талапқа сай сертификаттары бар. Бүгінгі таңда 200-ден астам жұмысшысы бар кәсіпорында 50-ге жуық балмұздақ түрі өндіріледі.«Балмұздақ» ЖШС-нің тарихы сонау 1987 жылдан бастау алады. Қоғамдық тамақтану кәсіподағына қарасты кішігірім цех ретінде негізі қаланған ол (сол кезде Ленгер Райпотребсоюзы) балмұздақ өндіру кооперативі болып құрылған. Райпотребсоюздан жеке меншікке сатып алу негізінде, фирма ретінде «Балмұздақ» ЖШС-і болып 1998 жылы наурыз айында қайта құрылған. Бұл Түркістан облысындағы алғашқы жеке меншік балмұздақ өндірісі еді.
Айта кетерлігі, кәсіпорын жақын арада өз тауарын Қырғызстанға, ал болашақта барлық Орта Азияға экспорттауды көздеп отыр.
