Түркістан облысы Бәйдібек ауданының орталығындағы спорт кешенінде Қазақстан Республикасына еңбек сіңірген жаттықтырушы, қазақ күресінен спорт шебері Темір Шубайұлын еске алуға арналған дзюдодан жасөспірімдер арасындағы IV халықаралық турнир өтіп жатыр.
Тартысты додаға 2006-2007 жылы туған дзюдошылар қатысып, бақтарын сынауда. Дәстүрлі түрде жыл сайын өтетін сайыстың ашылу салтанатына аудан әкімі Ержігіт Шәріпбеков арнайы қатысып, жарысқа қатысушы спортшыларға сәттілік тіледі. Сонымен қатар, турнирге келген Темір Шубайұлының шәкірттері — Түркістан облысының олимпиада резервін даярлау орталығының директоры Нұран Айтбеков пен Қазақстан Республикасының бокс федерациясының атқарушы директоры Марат Мықтыбековтер осындай жарыстардың өңірде көптеп өтуі ауыл таланттарын танытатындығын айтты.
Дзюдошылар бәсекесіне Алматы қаласы, Қызылорда облысы, Өзбекстан Республикасынан келген 20-ға жуық команда, 300-ге жуық спортшы қатысуда.
Татами төріндегі балуандар белдесуінде 8 салмақ дәрежесінде ұлдар жарыс көрігін қыздырса, 8 салмақ дәрежесінде қыздар өзара бақ сынауда. Жарыс жеңімпаздары бүгін белгілі болады. Байрақты бәсекені жоғары дәрежеде ұйымдастыруға Бәйдібек ауданы әкімдігі мен Түркістан облысының №3 олимпиада резервінің мамандандырылған балалар мен жасөспірімдер спорт мектебі мұрындық болды.
