Бүгін ҚР Ақпарат және қоғамдық даму министрі Дархан Қыдырәлі Түркістан қаласында Қазақстан мұсылмандары діни басқармасы жанындағы Ғұламалар кеңесінің ХХXV мәжілісіне қатысты.
Басқосуда Бас мүфти Наурызбай қажы Тағанұлы Дархан Қуандықұлына Ғұламалар кеңесінің жұмысы жайлы баяндады.
Министр бүгінгі таңда мүфтият қоғамда беделді, ықпалды, іргелі құрылымға айналғанын атап өтті. Сонымен қатар Діни басқарма халықты бірлік пен игілікке үндеуде үлкен іс-шаралар атқарып келе жатқанын тілге тиек етті.
Дархан Қыдырәлі өз сөзінде жастарды деструктивті діни ағымдардың ықпалынан сақтандыру, білімді, тәжірибелі діни мамандарды даярлау, медресе-колледждердің оқу бағдарламасын, техникалық базасын жетілдіру, шәкірттерге шешендік өнерді, дін психологиясын үйрету, ақпараттық бағыттағы жұмыстарды жандандыру т.б. мәселелерге назар аударды.
Айта кетсек, Ғұламалар кеңесінің кезекті мәжілісінде «Зейнетақы қоры жинағынан зекет беру үкімі», «Мәйіттің денесін тілудің үкімі», «Сюцайдың шариғи үкімі», «Дәрігердің нұсқауынсыз трамадолды қолданудың үкімі», «Қан донорлығының үкімі» т.б. пәтуалардың мәтіні талқыланды.
Басқосуда бұдан бөлек «Ұлттық құндылықтарды насихаттаудағы ҚМДБ рөлі», «Бабалар ізімен: Қазақстандағы мұсылмандық мектеп», «Ислам энциклопедиясы» еңбектері мен құжаттардың мазмұны қаралды.
Аллдағы уақытта ғұламалар кеңесі Алматы шаһарында өтпкек. Наурызбай қажы Тағанұлы Ғұламалар кеңесінің осы уақытқа дейін атқарған жұмысына оң баға берді. «Аллаға шүкір, Ғұламалар кеңесінің жұмысы жоғары деңгейде өтіп келеді. Соның нәтижесінде былтыр «Пәтуалар жинағының» үшінші томын жарыққа шығардық. Сонымен қоса ғылыми жобаларды қолға алдық. Осы орайда еңбек етіп, атсалысқан баршаңызға тағы да Алла разы болсын деп шынайы алғысымды білдіремін» деді Бас мүфти. Екі күнге жалғасатын мәжілісте «Әскери борышты өтеудің үкімі», «Қауесет таратудың үкімі», «Мемлекет және жеке тұлғаның мүлкіне қол сұғудың үкімі» т.б тақырыптар талқыланып, пәтуа беріледі. Сондай-ақ «MUFTIYAT» баспасынан жарық көрген жаңа кітаптардың тұсауы кесілмек.
