Түркістан облысы, Қазығұрт аудандық орталық мәдениет үйінде әжелер алқасы мен Адами әлеуетті дамыту бөлімінің ұйымдастыруымен «Аттап басқан алтын босағам» атты келіндер байқауы болып өтті. Бұл сайыстың басты мақсаты – шаңырақтың шайқалмауын насихаттап, ене мен келін арасындағы ауызбіршілікті сақтауға үлес қосу. Жарасымды отбасыны анықтап, өнегелі отбасын көпке үлгі ету.
– Жалпы «қазақ қызы», «қазақ келіні» деген атақтар халқымыз үшін өте киелі. Бүгінгі байқаудың шарты да көпшілікке соны түсіндіру, салт-дәстүрімізді жаңғырту десек артық айтқандық. Аталмыш байқау жоғары деңгейде өтті. Қатысушылардың барлығы тыңғылықты дайындықпен келген. Барлық үміткерлер де «Үздік келін» деген атауға расымен де ие, – дейді сайысты ұйымдастырушылар.
Келіндердің сөз саптауы, жүріс-тұрысы, мінез-құлқы, ибасы мен инабаты, киген киімі бәрі де сынға түсті.
Екінші бөлім — «Жақсы әйел-үй дәулеті», бұл бөлімде қатысушыларымыздың қолөнері және ас мәзірі сынға түсті. Келіндердің ісмерлігі мен қолөнері, ас әзірлеу шеберлігі, тағам тарту, ұқсата білу ұқыптылығын көрсету басты мақсат болып табылады. Үйден дайындап алып келген тағамдары ұсынылады.
Үшінші бөлім — «Балалы үй — базар», бала тәрбиесі туралы: Үлкенге құрмет, кішіге ізет баланың бойына қайдан дариды? Ұлттық тәрбие, бесік жырын білетін келіндер бар ма? Болса олар қандай бесік жырын біледі? Бесік жырын айтып беру керек. Төртінші бөлім — «Әйел-үйдің қазығы», бұл сайыс сұрақ-жауап ретінде өтеді. Отбасылық құндылықтарға сай салт-дәстүр, келіннің өмірлік жарының туған туыстарын қалай атайды, ат қою рәсімі, басқа да тұрмыстық салты, жөн-жоралғыны қаншалықты білетіні, әдет-ғұрыпқа байланысты біліктіліктері, ата-енесін сыйлау, құрметтеуге қатысты инабаттылығы, «барған жерін бақытты ететін» келіннің түсінік-танымы сынға түсті. Бесінші бөлім — «Келін көркі-өнер» — бұл бөлімде байқауға қатысушылардың шығармашылық қабілеті, ән салып, би билеу, суырып салу тапқырлығы, көркемсөз оқу шеберлігі сынға түсті.
Отбасының беріктігін арттыруда, ұрпақ тәрбиесінде ата-әженің, сыйластықтың алатын орнының зор екенін көрсету де негізге алынды. Сайысқа қатысушы алты үміткер төрт кезең бойынша өз өнерлерін көрсетіп, қазақ келініне тән сыпайылықты бойға сіңірген әрі ақыл-парасатты екендерін аңғартты. Жеңімпаздарға арнайы сый-сияпаттар мен мақтау қағаздары табысталды. Іс-шара мерекелік көңіл күйде өтіп, концерттік бағдарламамен жалғасты.
