Жетісай ауданында тұрғындар арасында салауатты өмірді насихаттау мақсатында игілікті істер атқарылуда. Соның бір дәлелі ретінде Ынтымақ ауылдық округі, Өркенді елдімекенінде бой көтеріп жатқан заманауи стадионды айтуға болады.
Бүгін аудан әкімі Мұрат Қадырбек бастаған жауапты сала өкілдері аталған нысан басына барып, құрылыс жұмыстарымен танысты. Өткен жылы құрылысты бастаған мердігер «Kazakh The-Stroy» ЖШС биыл да жұмысты кестеге сай сапалы жүргізіп келеді. Стадионда жүгіру жолы, көрермендерге арналған 500 орындық, жаттықтырушылар мен төрешілерге, медбикелерге арналған жеке кабинеттер бар. Сондай-ақ, командаларға арналған киім ауыстыру мен жуыну бөлмелері, тіпті, салтанатты шараларды өткізуге арналған трибуна да қарастырылған.
Мердігер мекеме басшыларымен жүздескен аудан басшысы құрылыстың сапасына мән беріп, бекітілген кестеден кешікпей нысанды ел игілігіне тапсыру керектігін айтты.
Айта кетейік, бүгінде ауданда бұқаралық спортты дамытуға бағытталған жұмыстардың нәтижесінде 60 мыңға жуық жетісайлық спортпен тұрақты түрде шұғылданады.
Ауданда бұқаралық спортты дамытуға ерекше мән беріліп, спорт кешендерінің жүйесі кеңейе түсіп, мектептер мен спорт үйірмелерінде дене шынықтыру мен шұғылданушылар саны көбейіп келеді. Мемлекет басшысы Қазақстан халқына жолдауында бұқаралық спортқа, дене тәрбиесіне және балаларға басымдық беріп, әр аудан орталықтарында спорт алаңшаларын ашу қажет деген тапсырма берді. Оған сәйкес, спортты дамыту мақсатында, материалдық базаны жақсарту бағытында жұмыс жасалуда.
Айта кетейік, Жетісай қаласынан дене шынықтыру-сауықтыру кешенін салу, сонымен қатар, кезең-кезеңімен ауылдардағы спорттық нысандарды қалпына келтіру жұмыстары жүргізілуде. Жүргізілген осындай ілкімді істердің нәтижесінде, бүгінде ауданда спорттың 19 түрі кеңінен дамытылуда. Тұрақты түрде дене шынықтырумен және спортпен шұғылданатын тұрғындар саны 60 241 адамға жетіп, аудан халқының 34,5 пайызын құрап отыр.
