Бүгін Түркістандағы «Фараб» әмбебап-ғылыми кітапханасында «Түркістан – Жаңа Қазақстан тұғырында» атты мерекелік іс-шара өтті. Іс-шараға қала әкімінің орынбасары Байдулла Жұмадуллаұлы, облыстық ардагерлер алқасының төрағасы Жарылқасын Әзіретбергенов, қалалық ардагерлер кеңесінің төрағасы Жарқынбек Құлбайымбетов қатысты.
– Еліміздегі қалалардың ішінде Түркістан шаһарының орны ерекше. Тарихи қаланың бүгінгі жаңарған келбеті де аса шырайлы, көңіл бұрарлықтай ғажайып. Экономикалық, әлеуметтік, мәдени даму жағынан да Түркістанның мәртебесі жоғары. Шаһардың гүлденуі – ол сіздердің ортақ еңбектеріңіз», – деді Байдулла Жұмадуллаұлы құттықтау сөзінде.
Түркістан жаңа дәуірімізде ұлтымыз бен ұлттық болмысымызды сақтауда ерекше үлес қосатын еліміздің мақтанышы, түркі дүниесінің рухани астанасы. Бұл қаламен мың жарым жылдық тарих сабақтасып жатыр. Он ғасырдан астам тарихтың қолтаңбасы жатқан қала өткен жылы жаңа құрылған Түркістан облысының орталығы болып бекітілді. Оңтүстік Қазақстан облысының Түркістан болып, орталығының Түркістанға көшуі – стратегиялық тұрғыдан да, саяси-экономикалық жағынан да, бастысы рухани-мәдени жағынан өте орынды шешім болды. Бұл Шымкенттің республикалық қала мәртебесін иеленуіне, Түркістан облысының басқа аудандарының дамуына жаңа серпін бермек. Қазақстанның экономикалық дамуы үшін, әрі геосаяси мәселеде ұтымды шешімдер қабылдауда Түркістанның облыс орталығы болғаны дұрыс. Көршілес елдермен тығыз қарым-қатынас орнатып, түркі елдерімен етене араласуда Түркістанның маңызы зор. Себебі түркі дәуірінің даму сатысының екінші көшпелі кезеңінде түркі жұртының атажұрты атанған дәл осы Түркістан еді. Жиырмадан аса хандарымыз бен атақты батырлардың қорымы жатқан жерде атақты Қожа Ахмет Ясауидің кесенесі орналасқан. Орта ғасырдың керемет сәулет ғимараты бүгінде көпшіліктің жыл сайын ағыла келетін тарихи-мәдени кешеніне айналды. Ежелде Шавгар деп аталған көне қалада ЮНЕСКО-ның қорғауындағы ғимараттар да жетерлік.
Қала күніне арналған рухани кеште «Түркістан – рухани құндылығымыздың астанасы» атты кітап және «Қол өнерім – мол өнерім» ұлттық қолөнер көрмесі ұйымдастырылды. Жиын барысында қаланың дамуына үлес қосқан бірқатар азаматқа қала әкімінің арнайы алғыс хаты табысталды.
Мерекелік іс-шарада мәдениет үйінің өнерпаздары және Қазақстан Республикасының Мәдениет қайраткері, танымал әнші Жұбаныш Жексенұлы әннен шашу шашып, қала қонақтары мен тұрғындарына керемет көңіл күй сыйлады.
