Шымкент қаласының денсаулық сақтау басқармасының қолдауымен медицина қызметкерлері біліктілігін арттырды. Басқарма жетекшілерінің арнайы шақыртуымен «University Medical Center» корпоративтік қоры республикалық диагностикалық орталық филиалының аллергология, пульмонология және орфандық аурулар бөлімінің меңгерушісі, аллерголог-иммунолог дәрігері Елена Ковзельдің қатысуымен семинар өтті.
Қалалық балалар клиникалық ауруханасында өткен іс-шараға медицина ұйымдарындағы педиатр, аллерголог, иммунолог, инфекционист, жалпы тәжірибелі дәрігерлер қатысты. Семинар барысында жергілікті ақ халаттылар иммундық жүйе аурулары, иммунды терапиямен емдеу, диагностика тәсілдері бойынша біліктілігін шыңдады.
Иммундық жүйе — жұқпалы аурулардан табиғи қорғаныс. Ал оның өнімділігіне әсер еткенде, салдары әрқашан болмаса да, жойқын болуы мүмкін. Бұл оның қалай өзгертілгеніне байланысты болады.Иммундық жүйе- морфофункционалдық жүйенің бүтіндігі болып табылатын, ағзаның ішкі ортасындағы антигендік тұрақтылықты қадағалайтын, миграция және рециркуляция жолдарымен байланысатын арнайы лимфойдтық мүшелер мен тіндердің өзара жиынтығы. Семинарға қатысушылар осы салаға қатысты бірқатар тың ақпараттар алды.
Семинар барысынджа шымкенттік ақхалаттылар сұрақтарын қойып, тұшымды жауап алды. Иммундық жүйе ауруларын емдеудің тың әдістерін де меңгерді. Шара соңында дәрігерлер бір-біріне мазмұнды ой-пікірлері үшін алғыс айтып, бұл тәжірибе алмасу емдеу жұмыстарына оң септігін тигізетініне сенім білдірді.
Айта кетсек, шымкенттік дәрігерлердің біліктілігін арттыру шаһар басшысының басты назарында. Мемлекет басшысы өз жолдауында да денсаулық сақтау саласына қатысты бірқатар жоба іске асатынын тілге тиек еткен. Мәселен медициналық материалдық азаны нығайтып, дәрігер біліктілігін арттыру шарасын күшейту де айтылған.
