Шымкент қаласында 7-9 қазан аралығында ересектер арасында WKF каратэден Қазақстан Республикасының чемпионаты өтті. Ел біріншілігінде Түркістан облысының құрамасы командалық кумите бағдардамасын орындауда топ жарды. Сондай-ақ, ерлер арасында да каратэ спортында ката бағдарламасы бойынша өнер көрсетіп, көш бастады.
Түркістандық спортшы Мәди Катешов жеке ката бойынша жеңімпаз атанса, жекпе-жек сайыста +84 келі салмақта Абылай Төлтай алтын медаль иеленді. Бұдан бөлек, әйелдер кумитэ бағдарламасы мен ерлер командасы арасындағы жарыста ката жекпе-жегінде Әсел Қанай күміс жүлдегер атанды. Сонымен қатар, Олжас Құлажан мен Гүлмира Үсенов күміспен күптелді. Ал, Еркебек Спандияр, Фатима Ерматова, Маржан Әшім мен Әбен Меруерт қола жүлдегер атанды.
Жарыс нәтижесіне сәйкес, облыс споршылары 4 алтын, 3 күміс және 4 қола иеленіп, жалпыкомандалық есепте бас жүлдеге ие болды.
Айта кетейік, жүйелі түрде дене шынықтырумен шұғылданатын барлық жастағы тұрғындардың санын арттыру үшін Түркістан облысында жұмыстар жүргізілуде. Өңір басшысы Түркістанда салынып жатқан «Мұз сарайының» құрылысымен танысты. Әлемдік стандарттарға сай мұз айдыны 1200 адамға есептелген. Мұнда қысқы спорт түрлерінен үйірмелер ашылмақ. Түркістанда салынып жатқан барлық ғимараттар қаланың көркі ғана емес, тарихи келбеті мен болмысын сақтай отырып, заманауи архитектураның озық жетістіктерін пайдалануда. Ғалымдар мен кәсіби мамандардың пікірі ескеріліп, тарихи келбетін жоғалтпауға басымдық берілуде. Түркістан қаласында сондай-ақ «Теннис орталығы», Олимпиадалық резерв мектебінің әкімшілік ғимараты мен жатақханасы, Б.Саттарханов спорт кешені, «Ат спорты кешені» секілді жаңа спорт нысандары ашылады.
