Қазақстан Республикасы Президентінің тапсырмасына сәйкес елімізде «Табиғатта қоқысқа жол жоқ» атты Республикалық акциясы бастау алды. Аталған акция аясында ауданда жаппай сенбілік өтті. “Тазалық денсаулық кепілі” деген ұстаныммен көшет отырғызу, тазалық жұмыстарына бір кісідей атсалысты. Бұл игі іс-шарадан мекеме, ұйым қызметкерлері де шет қалған жоқ. Сенбілікте төңіректер тазаланып, тал-дарақтар әктелді, арық-атыздар шабылды, мекеме-ұйым ғимараттары алдына көшеттер отырғызылды.
Акцияның басты мақсаты – қоғамда экологиялық мәдениет қалыптастыру және тұрғындарды қоршаған ортаны қорғауға, ортаның ластануына жол бермеу.
Сенбілікке барлық мекеме қызметкерлері және аудан тұрғындары бір кісідей атсалысты. Одан бөлек қажетті техникалар да жұмылдырылды. Нәтижесінде жол жиектері және арық жүйелері қатты қалдықтардан, арам шөптерден тазартылып, арнайы техникалардың көмегімен 3 тоннаға жуық қоқыс шығарылды.
Қай кезде де болмасын ең бірінші өз ортаңа тазалықпен қарау адамдықтың басты қасиеті екендігі белгілі. Аталмыш шараның аудан тазалығын сақтауда ғана емес, еліміздің экологиялық жағдайын жақсартуда да алар үлесі зор. Ауыл – ортақ үйіміз. Сондықтан, оның көркейіп, гүлденуіне әрбір тұрғын бей-жай қарамай, қоқыс-қалдықтарды кез келген жерге лақтырмай, таза ұстауға ат салысуы қажет. Өйткені, ортақ үйіміздің көркеюі өз ауламызды таза ұстаудан басталатыны белгілі. Сенбілік барысында осыны жастарға сабақ еткен тұрғындар қаймағы бұзылмас ынтымақ пен бірліктің ерен үлгісін көрсетті.
Жалпыхалықтық шара барысында ауызбіршілік пен ынтымақтың ерен үлгісін көрсеткен көпшілік көңілді әрі белсенді қимылдап, тазалық жұмыстарына біркісідей атсалысты. Жалпы отырарлықтар сенбілік жұмыстарының екіжақты тәрбиелік мәні бар деп санайды. Біріншіден жастарды еңбекке баулу болса, екінші жағы туған жеріміздің таза, әрі тартымды болуы, яғни, ішкі мәдениеттілікті қалыптастырудағы маңызы зор.
Сала жауаптылары тазалық әркімнің өз ауласынан басталатынын ескерте отырып, аудан тұрғындарын аталған тазалық шарасына өз үлестерін қосуға шақырады. Себебі, Отан – баршамыздың ортақ мекеніміз,-дейді олар.
