Мемлекет басшысының жарлығымен қала, аудан әкімдері тұрғындармен тоқсан сайын кездеседі. Осыған орай, қала әкімі Жандос Тасов қала тұрғындарымен кездесті. Кездесуде тұрғындарды мазалайтын газ мәселесіне тоқталып, бүгінгі таңда әр этап бойынша қала тұрғындарын көгілдір отынға қосу жұмыстарын баяндады.
Сонымен қатар, көпқабатты тұрғын үйлердің аулаларына ойын алаңшалар орнатып, жолдарды реттеу шаралары келесі жылы қаржының бөлінуіне қарай жоспарланып отырғанын мәлімдеді. Жалпы, қаладағы 33 аулаға орнату көзделген.
Кездесуге келген тұрғындар бірқатар мәселерді көтерді. Атап айтқанда, көше жолдарын асфальттау, жарық орнату, су мәселесі, үйлерді газға қосу, жылу мәселесі секілді коммуналдық салаға қатысты және әлеуметтік мәселелер айтылды.
Жиынға қала әкімінің орынбасарлары, сала және мекеме басшылары қатысты. Кездесуде көтерілген әрбір тұрғынның сауалына қала басшысы жеке-жеке тоқталып, заң аясында жауап берді. Әрбір ұсыныс назарға алынып, оңтайлы шешілу жолдары қарастырылатынын жеткізді.
«Сіздер көтерген мәселе бүгін ғана туындаған емес. Сондықтан, мұның барлығы бір күнде шешіліп кетпейді. Біржарым айдан бері қаладағы әр көшені аралап тұрғындарды толғандырған мәселелермен танысып келемін. Бар күш жігеріммен xалыққа қызмет етуге әзірмін. Сондықтан сіздерден сабырлы болуды сұраймын», — деген қала басшысы тұрғындарды бірлікке шақырып, қаланы бірге көркейтуге үндеді.
Айта кетсек, Кентау қаласында аулалар абаттандырылып, алаңшалар салынып жатыр. Бұл шаһар жыл санап көркейіп келеді. Көшелер жөнделіп, шағынаудандардың жолдары тегістеліп жатыр. Алдағы уақытта кенді шаһардың барлық аулалары ойын алаңшаларымен қамтылатын болды. Жалпы алдағы уақытта қаладағы барлық аулаға жаңа спорт және балалар ойын алаңшасын салу көзделген. Ойын алаңшаларымен қатар ауланы абаттандыру жұмыстары да жүргізіледі. Көпқабатты үйлердің маңы асфальтанып, көлік қоятын тұрақтары да іске қосылады. Сондай-ақ тұрғындардың еркін демалуы үшін бастырма, жаңа орындықтар мен спортпен шұғылдану құрал-жабдықтары қоса орнатылады.
