Төрткүл дүниені түгел мойындатқан қазаққа ғана тән, бағзы заманнан, батыр бабалардан мирас болған асыл өнер, ұлттық спортымыз – көкпарға деген көзқарас өзгеріп, күн санап қызығушылық танытушылардың қатары артып келеді.
Жетісай ауданының әкімі Мұрат Болатұлы жуырда ғана Түркияның Изник қаласында өткен IV дүниежүзілік көшпенділер ойынында көкпардан жеңіспен оралған Қазақстан ұлттық құрамасының мүшесі, жерлесіміз Абылайхан Нышанбеков пен Жетісай аудандық көкпар федерациясының Президенті Сабыр Айбековты қабылдады.
Қырғызстан құрамасымен өткен жауапты кездесу барысында еліміздің ең таңдаулы көкпаршылары сапында намысты қорғаған Абылайханды алғыс хатпен марапаттап, сый-сияпат жасады.
Бүгінде ұлттық ат спортын дамыту, елдімекендерде бұқаралық спортты қолға ала отырып, жастардың ұлттық ойынға деген қызығушылықтарын арттыру, көкпар ойынының бекітілген ережелері мен дүбірлі ат додасын өткізуде қоғамдық тәртіпті қатаң сақтау, адам өміріне төнетін қауіптердің алдын алу, көкпардың бүгінгі жай-күйі жайында пікір алмасты.
Еске салсақ, көкпардан Қазақстан ұлттық құрамасы 4-ші Дүниежүзілік көшпенділер ойынында бас жүлдені иленген болатын. Отандастарымызды жеңіске бастаған бұл доданың ақтық сынында Қырғызстан құрамасымен жауапты кездесу барысында Түркістан облысының талантты көкпаршысы Әділет Мамыт екі бірдей салым тастап, қазақстандық шабандоздарды алға сүйреді. Еліміздің ең таңдаулы көкпаршылары құрамасында облысымыздың төрт спортшысы Арман Жамалбеков пен Абылайхан Нышанбеков, Дәулет Айтан пен Әділет Мамыт өнер көрсетіп, ел намысын қорғады. Әр төрт жыл сайын өтетін Дүниежүзілік көшпенділер ойынында түркістандық атақты шабандоз Әділет Мамыт өзінің мықтылығын көрсетіп, құрамадағы жігіттерді жеңіске бастады.
«Басы қайырусыз, аяғы жиюсыз жатқан қазақ елінің қанын қыздырып, жүрегіне от беріп, делебесін қоздыратын көкпар ойыны өздеріңіздей азаматтар барда заманына сай жаңғырып, жасарып қазақпен бірге жасай береді. Сондықтан да біз өзіміздің ұлттық құндылықтарымызды дәріптеп, насихаттауға, дамытуға, бекітілген ережелерді қатаң сақтауға міндеттіміз» деді аудан басшысы кездесу соңында.
