8 қазан күні Мемлекет басшысы жариялаған «Қоқыссыз таза табиғат» жалпыұлттық акциясына орай Түркістан облысының барлық аудан, қалаларында жаппай экологиялық сенбілік өтеді.
Қоршаған ортаны таза ұстау — әр азаматтың парызы. Осы орайда, мамандар облыстың барлық тұрғындарын акцияға қатысуға және табиғатты қорғауға өз үлестерін қосуға шақырады.
Сенбілік барысында Түркістан қаласы бойынша әкімшілік іскерлік орталықтың маңындағы көпқабатты үйлердің аумағы, С.Ерубаев көшесінде орналасқан «Жеңіс» саябағы мен Б.Саттарханов көшесіндегі «Жібек жолы» саябағында тағы басқада аумақтарда тазалық жұмыстары ұйымдастырылады. Сонымен қатар, қаланың барлық көшелері мен саябақтары тазаланатын болады. Жұмыла көтерген жүк жеңіл демекші, тазалыққа сіз бен біз болып атсалыссақ нәтижесі жоғары болады дейді шараны ұйымдастырушылар.
Бүгінде облыс әкімінің бастамасымен Түркістан қаласының экологиялық ахуалын жақсарту мақсатында 2019-2022 жылдары қала айналасынан 7700 гектар жерге «Жасыл белдеу» құру жоспарланды. Қазір барлығы 13 629 га жерге көшеттер егіліп, күтіп-бапталуда. Алдағы уақытта «Жасыл белдеу» аумағын 30 мың гектарға жеткізу көзделуде. Облыстың орман шаруашылығы мекемелерінің тұқымбақтарында бүгінде 30 млн данадан астам әртүрлі орман ағаштарының көшеттері өсіріліп жатыр.
Ұйымдастырушылар өңір тұрғындарын тазалық шарасына қатысуға шақырады. Тазалық денсаулық кепілі дегенді алға тартқандар қоқысты тазарту арқылы экологияны жақсартуға үлес қосатынын жеткізді.
«Қоқыссыз таза табиғат» акциясы табиғатқа саналы, ұқыпты қарауды қалыптастыруға бағытталған. Бастамаға қоғамдық ұйымдар, азаматтық белсенділер, студенттер және еріктілер қосылады деп жоспарланған. Бір уақытта жиналғандар өңірде қоқыстан тазартып, таза табиғаттың болуына ат салысатын болады.
Сала жауаптылары арнайы жиналу күні мен уақытында белгілеп қойған. Оған сәйкес Түркістандықтар 8 қазан күні, сағат 10:00 де жиналады. Анықтама үшін байланыс нөмірі: 8 775 627 0404.
