Түркістан: Сарыағашта заманауи спорт алаңшасы ашылды

Сарыағаш ауданына қарасты Дарбаза ауылдық округінде спорттық нысандардың санын арттырып, жастарды спортқа баулу мақсатында заманауи спорт алаңшасы бой көтерді.
Аудан әкімі Мұхит Отаршиев спорт алаңшасының ашылу салтанатына қатысып, ізгі лебізін білдірді.
— Бұл — мемлекетіміздің ел келешегін, ұрпақ болашағын қамдастырып отырған салиқалы саясатының жарқын көрінісі. Бүгінгі пайдалануға беріліп отырған алаңша спортты сүйетін қалың жұртшылықтың, әсіресе, жастардың қымбатты ордасына айналсын. Келешекте республикамыздың намысын қорғайтын Азия, Әлем, Олимпиада чемпиондары шықсын! – деді аудан басшысы.
Айта кетсек, аталған спорт алаңшасы аудандық бюджет есебінен салынды. Жалпы ауданы 0,30 гектарды құрайтын спорт алаңшасында футбол алаңы, автотұрақ, сонымен қатар Workout-пен (жаттығу алаңшасымен) жабдықталған. Мұнда жақын маңда тұратын балалар волейбол, футболдан жарысып, қосымша спорт түрлерімен де айналыса алады.
Еске салсақ, осыған дейін Сарыағаш қаласында заманауи спорт кешені ашылған еді. Заман талабына сай салынған кешен қажетті құрал- жабдықтармен жасақталған. Мемлекет басшысының бұқаралық спортты дамыту бағытында берген тапсырмасы Сарыағаш ауданында тиянақты орындалуда. Бүгінде спортшылар спорттың жеті түрімен бос уақыттарында шұғылдануда. Атап айтқанда футбол, бокс, дзюдо, шахмат, күрес, жүзу. Сондай-ақ, ауыр атлетикамен айналысуға да мүмкіндіктері бар.
«Денсаулық кілті – дене шынықтыру. Қайталап айтамын: бұқаралық спортқа, балалар спортына барлық жағдайды жасау қажет. Облыс әкімдері спорт инфрақұрылымының кезең-кезеңімен құрылуын қамтамасыз етуі керек», – деді Президент. Иә, бүгінде Сарыағашта бұқаралық спорттың дамуына ерекше көңіл бөлініп отыр. Ауданда тұрғындардың саламатты өмір салтын ұстауына толық жағдай жасалған.