Бүгінде Созақ аудандық орталық ауруханасында 508 орта буын медицина маманы халыққа қалтқысыз қызмет етуде. Оның 29-ы акушер, 20-сы фелдьшер, 24-і зертханашы, 5-еуі рентген лаборанты, 2-еуі тіс технигі болса, 427-сі медбике.
Яғни осы буын өкілдері денсаулық сақтау саласының алға жылжуына үлкен үлес қосып, отандық денсаулық сақтаудағы ең жақсы дәстүрлерді жоғалтпай, әлемдік тәжірибені игеріп, өздерінің күнделікті тәжірибесінде медициналық көмек көрсету сапасын арттыра отырып, мейірбикелік күтімді жетілдіру және денсаулық сақтау жүйесінде шығындарды төмендету бағыты бойынша айтарлықтай еңбек етіп келеді. Мейірбике тек қана дәрігер бұйрығын орындаушы ғана емес, ол ойшыл, үнемі ізденісте жүретін шығармашыл тұлға. Оның негізгі мақсаты – адам денсаулығы мен қоршаған ортаны қорғау қажеттігін қанағаттандыруға негізделеді. Яғни бір сөзбен айтқанда, емделушінің күтімін ұйымдастырушы, күтімін орындаушы, емделушінің ықыласын қорғаушы, кеңесші, зерттеуші, медициналық топтың белсенді мүшесі. Ендеше науқастарға психологиялық тұрғыдан демеушілік көрсетіп, мейірімділік танытып жүрген ақ желеңді абзал жандардың жан-жақтылығы бүгінгі уақыт талабы.
Сондай-ақ мейірбике өз қызметі барысында ұйымдастырушылық, ғылыми-зерттеушілік, оқытушылық міндеттер сияқты қағидаттарды басшылыққа ала отырып жұмыс істейді. Халық денсаулығын жақсарту, медициналық қызмет сапасын арттыру, халықты қолжетімді медицинамен қамтамасыз ету, медициналық алғашқы жәрдемді жетілдіру, ана мен бала денсаулығын қорғау, аурудың алдын алу бағытындағы скринингтік тексерулер, тұрғындарды салауатты өмір салтына баулу, басқа да қаншама шаралардың жүзеге асырылуында мейірбикелер жүреді. Сондықтан науқасты қабылдағаннан бастап, оны емдеу барысындағы барлық күйбең тіршіліктің бел ортасында жүретін мейірбикелер еңбегі қоғам алдында қашанда бағалана бермек.
Әріптестерімнің біліктіліктері туралы айтар болсам, 105 мейірбике жоғары санатты, 27-сі бірінші, 6-уы екінші санатты мамандар. Енді орта буын медицина қызметкерлерінің кәсіби біліктілігін арттыру, шеберлігін шыңдау, білімін жетілдіру бағытында да көптеген жұмыстар атқарылып жатыр. Мемлекет тарапынан медицинасы дамыған елдерге барып тәжірибе жинақтап, жұмысымызды жетілдіріп жатқан жайымыз бар. Сонымен қатар мейірбикелеріміз өңірлік оқу орталықтарында білікті мамандардан дәріс алып, білімдерін жетілдіру үстінде. Бұл жұмыстар алдағы уақытта да жалғасын таба бермек. Тағы бір айтары, республикалық, облыстық емдеу орталықтарынан білікті мамандар ауданымызға келіп, түрлі тақырыптарда шеберлік сыныптарын өткізуде.
Ауданымыздың денсаулық сақтау саласында талай жыл тапжылмай тер төгіп, еңбегімен елдің ыстық ықыласына бөленген ардақты мейірбикелеріміз, сала ардагерлері де аз емес. Алдыңғы толқын апаларымыздың ұлағатты істері мен өнегелі еңбек жолдары кейінгі толқынға үлгі болары сөзсіз. Жалпы алғанда мейіргерлік кәсіп немесе мейірбике ісі денсаулық сақтау жүйесінің бөлінбес бөлшегі.
Иә, өмірге сән беріп, тіршілікке нәр беріп, қалтқысыз қызметін ұсынып, мейірімділік пен жылылықтың символына айналып, игілікті мамандық иесі атанған мейіргер ісі – қашанда сый-құрметке лайық. Өйткені тұрғындарға медициналық көмек көрсетудің тиімділігі көп жағдайда мейіргер жұмысына тікелей байланысты.
Мадина МАХАНҚЫЗЫ,
Созақ аудандық орталық ауруханасының бас мейірбикесі
Түркістан облысы
