«AMANAT LIDER» дебат турнирі – азаматтардың ораторлық қабілетін шыңдауға, саяси ұстанымдарды қалыптастыруға, лидерлік қасиетті дамытуға және партияның кадрлық резервін жасақтауға бағытталған жоба. Бәсеке «AMANAT» партиясы Түркістан облыстық филиалының бастамасымен жүзеге асырылып келеді. Кезекті пікірсайыс алаңы Кентауда ұйымдастырылды. Кентау қалалық мәслихатының хатшысы Балабиев Талғат Рахымұлының қатысуымен өткен пікірсайыс турнирі қалалық Жастар ресурстық орталығында болып өтті.
Сайысқа партияның қалалық филиалының Атқарушы хатшысы Арман Басаров, қалалық мәслихат хатшысы Талғат Балабиев, арнаулы кәсіптік колледж директоры Роза Аяпбергенова, “Жастар ресурстық орталығы” КММ-нің директоры Қанат Бекметов қазылық етіп, спикерлерді бағалады.
Білімділер сайысының басты мақсаты азаматтардың ораторлық қабілетін шыңдау, толеранттық тәртіппен азаматтық танымды дамыта отырып қоғамдағы маңызды мәселелер аясында азаматтардың өз көзқарастары арқылы шешім қабылдап, құқық сауаттылықты жан-жақты мониторрингтік зерттеулер жүргізе отырып пікірсайыс арқылы толығырақ насихаттау.
Ұйымдастырушылардың айтуынша «AMANAT LIDER» дебат турниріне, бақ сынауға ниеттілердің қатары көп болған. Бәсекенің алғашқы кезеңінде «өңірдегі өзекті мәселелері және шешу жолдары» тақырыбы таңдалып, қатысушылар пікірталас жүргізді. Белгіленген уақыт аяқталған соң өзара сұрақ-жауапта сайысты ширата түсті. Ал екінші кезеңге жолдама алғандар ел Президенті Қасым-Жомарт Кемелұлы Тоқаевтың «Әділетті Мемлекет. Біртұтас ұлт. Берекелі қоғам» атты Жолдауы бойынша қызу пікір таластырып, үздік ойын өрнегін көрсете білді.
Пікірсайыс жарысының нәтижесінде «М.Қашғари» атындағы лицейдің ағылшын тілі пәнінің мұғалімі З.Амин жүлделі 3-орынға ие болды. Ал, қалалық орталық аурухананың терапевт-дәрігері Т.Нармахан сайыстың 2-орынынан көрінді. Әділ қазылар алқасының шешімімен ұтымды ұсыныстар айта білген А.Мұхан турнир жеңімпазы атанды.
Тартысты додаға қатысқан спикерлер, жүлдегерлер мен жеңімпаз алғыс хатпен марапатталып, арнайы сыйлықтар табысталды.
