Бүгін Түркістан қаласындағы Фараб кітапханасында көрнекті мемлекет және қоғам қайраткері, жазушы, ақын, ғалым Асанбай Асқаровтың туғанына 100 жыл толуына арналған конференция өтті.
Аталған шараға қала әкімінің орынбасары Ерлан Күзембаев, қалалық ардагерлер кеңесінің төрағасы Жарқынбек Құлбайымбетов, облыстық әмбебап ғылыми кітапханасының директоры Жанат Шардарбекова қатысты.
Тағылымы мол басқосуға жиналғандар Асанбай Асқаровтың өмір жолы мен атқарған қызметтері жайлы баяндама жасап, сондай-ақ қайраткердің ауыл шаруашылығы саласындағы, өңірдің экономикасын дамытудағы ерен еңбегін тілге тиек етті.
Асанбай Асқарұлы Алматы, Жамбыл және Оңтүстік Қазақстан облыстарын басқарып, осы өңірлердің әлеуметтік-экономикалық дамуына үлкен үлес қосқан азамат. Асанбай Асқаров Социалистік Еңбек Ері, талай жыл Жамбыл, Алматы, Оңтүстік Қазақстан облыстары партия комитетінің бірінші хатшысы болып жемісті еңбек еткен. Ел ағасының облыс тұрғындары үшін жасаған игі істері мен қалдырған ізгі мұраттары бүгінгі ұрпаққа үлгі болып, ел есінде мәңгілікке сақталады. Тілге тиек етейік, Асанбай Асқаров Оңтүстікті өркендетіп, Шымкенттің шырайын ашқан іскер басшы. Өткен ғасырдың 80-ші жылдарында өңірде 180-ге жуық өнеркәсіп орны жұмыс істеді. Көпқабатты тұрғын үйлер бой түзеп, Одақ көлемінде теңдесі жоқ дендросаябақ салынды. Зообақ, балалар темір жолы, атшабар секілді әлеуметтік нысандар ел игілігіне берілді. Бүгінде Шымкент қаласындағы орталық көшелердің бірі және дендросаябақ Асанбай Асқаров есімімен аталады. Ескерткіші мен мұражайы бар. Облысымыздағы А.Асқаровтың қолтаңбасы саналатын нысандар мен жобалардың бүгінде игілігін халық көріп отырАқиқатшыл адалдығымен, биік пайым парсатымен ел есінде қалған тұлғаны ұлықтау әрі қарай да жалғасын таппақ.
