Өзбекстанның Наманган қаласында белбеу күресінен Әлем чемпионаты өтті.
Жарыста Ә.Нұрмаханов атындағы олимпиада резервінің мамандандырылған балалар-жасөспірімдер спорт мектебінің шәкірттері облыс намысын қорғады.
Өзбекстанның Наманган қаласында белбеу күресінен өткен Әлем чемпионатының жүлдегерлері Түркістан қаласының әкімі Нұрбол Тұрашбековтің қабылдауында болды.
Дүниежүзілік дода қыркүйек айының 8-11 күндері аралығында өтті. Тартысқа толы сайыста түркістандық Айдарбек Тоқтарбек кілемге шыққан қарсыластарын түгел жеңіп, әлем чемпионатының алтынын мойнына тақты. Тоқтарбекті көпшілік самбо күресіндегі жетістіктері арқылы таниды. Ол 2016 жылы жастар арасындағы әлем біріншілігінде қола медаль еншілеген. Одан кейін 2017, 2018 жылдары қатарынан екі рет «сары құрлық» біріншілігінде күміс жүлдегер атанған-ды. Сол 2018 жылы әлем біріншілігінде тағы да қола жүлде иемденген. Ол – самбодан және қазақ күресінен ҚР спорт шебері. Айдарбек Тоқтарбек 100 келі салмақ дәрежесінде жеңімпаз атанса, Ел қоржынына екінші алтынды шардаралық Қайсар Шамшидинов салды. Ал, жеңіл салмақта құрама қоржынына бір алтын жүлдені отырарлық Қалмұхан Тұрмағанбет салды. Ол 57 келі салмақ дәрежесінде қарсылас шыдатқан жоқ. Қыздар арасында Айнұр Ақжігітова 66 келіде, Гүлзира Құдасбек 58 келіде қола жүлдеге қол жеткізді.
Көк туымызды желбіреткен спортшыларды облыстық жауынгерлік өнер қауымдастығының Құрметті президенті, ҚР ҰҚК Түркістан облысы бойынша департаментінің бастығы, генерал-майор Әбілсейіт Дүйсебаев құттықтап, алдағы жарыстарға сәттілік тіледі. Шаһар басшысы Нұрбол Әбдісаттарұлы балуандар мен бапкерлері Жақыпбек Қасымбеков пен Әбсадық Халиллаевқа Алғыс хат ұсынып, сый-сияпат табыстады.
«Жүрегі елім деп соққан рухты спортшылармен мақтанамыз. Ерік-жігерді бойға жинап сыннан сүрінбей өткендеріңе алғыс білдіремін. Спорт әлемінде тау тұлға деп атайтындай есімдеріңді таныта беріңдер», — деді Әбілсейіт Оразақынұлы.
Айта кетейік, спортшылар «Түркістан облыстық Ә.Нұрмаханов атындағы олимпиада резервінің мамандандырылған балалар-жасөспірімдер спорт мектебінің сайыпқырандары. Чемпиондар мектебі атанған спорт мекемесі үздіктерінің жолын жалғаған ізбасарлар.
