15 — тамыз жерлесіміз, Қазақстанның халық әртісі, композитор, қазақ мәдениетіне еңбегі сіңген қайраткер, қазақ вальсінің королі Шәмші Қалдаяқовтың туған күні. Қырық жылдан астам уақыт ішінде сазгер 300-ге жуық музыкалық туынды жазды. Кеңестік жылдарда қазақ ұлттық музыка өнерінің ән жанрына жаңа леп алып келді. Композитор елге, жерге, Отанға, ата-анаға деген махаббатын әсем әуенмен жеткізе білді.
Бүгін даңқты жерлесіміздің 92 жылдық мерейтойы аясында композитордың атымен аталатын ауылдағы мәдениет үйінде Түркістан облысы мәдениет басқармасына қарасты Ш.Қалдаяқов атындағы облыстық филармония ұжымының «Шарықтасын Шәмшінің асыл әні» атты концерті өтті. Ән падишасы Ш.Қалдаяқовтың әндерін насихаттау мақсатындағы кештің шымылдығы Сабырхан Асановтың сөзіне жазылған Ш.Қалдаяқовтың «Отырардағы той» әнімен ашылды.
Концерт барысында филармония әншілерімен қатар, есімдері елімізге белігілі эстрада жұлдыздары, кеш қонақтары өнер көрсетті. Өнер кешіне облыстық мәдениет басқармасының басшысы Әзімхан Қойлыбаев, аудан әкімінің орынбасары Айдос Құлмаханов арнайы қатысып, жерлесіміз Шәмші Қалдаяқовтың халықтың жүрегінен орын алған әндерін шырқап, көпшілікке кеңінен насихаттап жүрген филармония ұжымына шынайы алғысын айтты.
Шәмші әндері келер ғасырға өзінің мәнімен, әсерімен жетіп, жыл өткен сайын жаңғырта берері сөзсіз. Халқымыздың рухани өмірі мен музыкалық мәдениетіндегі Шәмші Қалдаяқовтың алатын орны орасан екені — ешқандай дәлелдеуді қажет етпейтіні шындық. Бүгінгі облыстық филармония ұжымының да өткізіп жатқан өнер кеші Ш.Қалдаяқовтың балалық шағы өткен ауылда ұйымдастырылды.
Концертке келген көпшілік сағынышқа айналған әуезді әндерді тыңдап, ерекше сезімге толы көңіл-күймен тарқасты.
