Түркістан облысының Өңірлік коммуникациялар қызметінің хабарына қарағанда, Келес ауданы, Абай ауылында тоғыз балалы омарташы тоғыз мың араны өсіреді.
45 жастағы Мәлік Айтымбетов бүгінде 70 жәшік бал арасын ұстайтын ауылға аты мәлім омарташы. Осы кәсіппен айналысқанына 7 жылдың жүзі болған. Кәсібі бірден дөңгелеп кете қоймаған көрінеді. Тоғыз ұл-қыздың әкесінің айтуынша былтырғы жылдан бастап отбасына береке кірген. Үкіметтен 9 балаға атаулы әлеуметтік көмектің арқасында 1 млн 498 мың теңге қаржы берілген. Осы қаржыға бал өндіретін диірмен, омарта жәшіктерін, көшіруге тіркеме сатып алыпты. Бүгінде аталмыш көмектің арқасында ісін өрге домалатып, балдың 10 түрін өндіріп отыр.
Жуырда ғана бала күтімінен босап, бір мекемеге тазалаушы боп орналасқан әйелі Нағима Айтымбетова Алтын алқа иегері. Үйдің үлкендері Нұр-Сұлтан қаласындағы жоғары оқу орнының бірінде студент. Омарташылықпен айналысатын отбасы алдағы уақытта кәсіптерін кеңейтіп, бал арасы орналасқан тіркемелерді таситын жүк көлігін сатып алсақ деген мақсаттары бар.
Үмітбек БАҒДАТ.
