Түркияның Конья қаласында V Ислам ынтымақтастығы ойындары тартысқа толы өтуде. Дүбірлі додада 56 елден 4 мыңнан астам спортшы бақ сынап жатыр. Қазақстан атынан спорттың 16 түрінен 125 спортшы барған болатын.
Жүзу спортынан Қазақстан құрамасының үздіктерінің бірі –түркістандық Аделаида Пчелинцева жарқын жетістігімен ел мерейін үстем етуде. Ол алдымен жекелей сында алтын медаль еншілесе, одан кейін 100 метрге брасс әдісімен жүзуде күміс жүлдеге ие болды. Жерлесіміз одан кейін командалық эстафеталық жүзуден бір күміс және қола жүлдені олжалады. Ол, 4х100 метрге еркін жүзуде қолаға қол жеткізсе, 4х100 метрге аралас эстафетада күміспен күптелді. Осылайша, талантты спортшы бесінші рет ұйымдастырылған Ислам ынтымақтастығы ойындарынан жалпы 4 медаль жеңіп алды.
Аделаида Пчелинцева — Жүзуден Қазақстан Республикасы Ұлттық құрама командасының мүшесі. 1999 жылы 29 қыркүйекте Павлодар қаласында дүниеге келген. Жүзуден Қазақстан Республикасының спорт шебері. Әр түрлі пәндер бойынша Қазақстан Республикасы чемпионаттарының чемпионы және жүлдегері, 2019 жылғы Қазан қаласында жүзуден Әлем Кубогының қатысушысы. 2019 жылы 50 метр қашықтықта жүзуден Қазақстан Республикасы Чемпионатының рекордсмені.
Ғаламат нәтиже көрсеткен спортшы Түркістан облысының су спорт түрлерінен олимпиада резервін дайындайтын мамандандырылған балалар мен жасөспірімдер спорт мектебінің шәкірті.
Айта кетейік, Бұл Түркиядағы Қазақстандықтардың 13 «алтыны» және Ислам ынтымақтастығы ойындарының рекорды. Бұған дейін ауыр атлетикадан Қазақстанға «Алтынды» Арли Чонтей (55 келіге дейін) және Зульфия Чиншанло (59 келіге дейін), ал әйелдер күресінен Елена Шалыгина (65 келіге дейін) алып келген болатын.
