Жазба және айтыскер ақындар арасындағы «Күміс қалам» және «Күміс домбыра» байқаулары биыл екінші рет өтуде. Былтыр Шымкент қаласында өткен жыр сайысы биыл Төлеби ауданындағы керемет табиғат аясында ұйымдастырылды. Жыр мүшайрасына 16 ақын мен 16 айтыскер қатысты. Дарынды жастардың қабілетін елімізге белгілі ақын Бекарыс Шойбеков бастаған қазылар алқасы бағалады. Бұдан бөлек, қазылар қатарына өнер мектебінің директоры Маржан Есжанова, «Алтын домбыра» жүлдесінің үш дүркін иегері Мұхтар Ниязов, Әл-Фараби атындағы кітапхананың директоры Анар Жаппарқұлова кірді.
Қазақтың бас ақыны Абай Құнанбайұлының туған күніне орай өткен жас ақындар арасындағы республикалық «Күміс домбыра» байқауында 11 сынып оқушысы отырарлық Даниял Болысбек бас жүлдеге ие болды. Жеңімпазға күміспен апталған домбыра табыс етілді.
Атап өтейік, бірінші орынды Алматы қаласынан келген Айым Асылбекқызы, екінші орын — Қызылордадан келген Нұрахмет Мансұров және Түркістан облысының саңлағы Аян Ниязбек ұтып алса, екі үшінші орынды шымкенттік жас ақындар Нұрғали Әнапия мен Жандос Мырзабеков қанжығаға байлады.
Естеріңізге сала кетейік, былтыр бастау алған бұл байқауға республиканың әр өңірінен 14 пен 29 жасқа дейінгі 30 айтыскер мен 30 жазба ақын қатысуға ниет білдірген. Іріктеу сынынан өткен 16 айтыскер және 20 жазба ақын байқаудың негізгі кезеңіне жіберілген болатын. 20 жазба ақынның арасынан іріктеліп, үздік шыққан ақтөбелік Ершат Қайболдин жеңімпаз атанды. Оған арнайы күмістен жасалған қалам мен бағалы сыйлық табысталды. Ал, ақтық сынға шыққан Айдана Қайсарбекқызына Есенғали Раушанов атындағы арнайы сыйлық берілді. Сонымен қатар, жартылай финалға өткен 4 ақынға Жәркен Бөдешұлы, Әбілда Аймақ, Жеңіс Баһадүр, Әділ Ботпанов атындағы арнайы сыйлықтар табысталды. Ал, қалған 14 ақын қаламақы мен бағалы сыйлықтармен марапатталған еді.