Бізің қоғамда «Торт пісіру, қамыр илеу, қазан-табаққа араласу тек әйелдердің ғана ісі» деген жаңсақ пікір қалыптасқан. Кондитерлік, аспаздық мамандықты кәсіп етсек айналамыздағылар мазақ ететіндей түсінік бар. Көпшілік арасында қалыптасқан осындай пікірді 30 жасар Жетісайлық кондитер жігіттің жеткен жетістіктері жоққа шығарарына сеніміміз мол.
Бүгінде Алматы қаласында өз кәсібін ашып, бірнеше адамды тұрақты жұмыспен қамтып отырған Нұрсұлтан Бекботаев Түркістан облысы, Жетісай ауданы, Ынтымақ ауылдық округіне қарасты «Ынтымақ» ауылында туылған. Отбасында бес перзенттің үшіншісі. Асықата кентіндегі «Асықата» жалпы орта мектебінде оқып білім алған жігіт 18 жасында арман қуып Алматы қаласына келген.
Алғашқыда тұрақты жұмыс таба алмаған соң ауылдас досымен бірге печенье пісіретін цехқа жұмысқа орналасады. Анасы үйбикесі, ал, әкесі қарапайым ғана диқаншылықпен айналысатын Нұрсұлтанның осы цехта жұмыс істеп жүріп кондитерлік өнерге деген қызығушылығы оянады. Бір жыл контидерлік цехта, бір жыл нан пісіру цехында жұмыс істеп, біраз тәжірибе жинақтаған соң өз ісін ашуды жоспарлайды. Жиған-терген қаржысына достарынан қарыз алып қосып, «Sultan_pastry» шағын кондитерлік цех ашады.
Қаймақ, ірімшік, сүт, шоколад сынды қоспалардың сапалысын ғана пайдаланатын цехта бүгінде торттың 30-ға тарта түрі мен мейрамхана, кафелердің тапсырыстары бойынша тәттілердің түр-түрі дайындалады. «Instagram» желісінде «@sultan_pastry» парақшасын ашып, той-думандар мен мерекелерге тапсырыстар қабылдайды. Интернет дүкендер арқылы тапсырыс берілетін торттардың келісі 4000 теңгеден басталады, тапсырыс берілген тәттілерді қала бойынша ақылы жеткізіп беру қызметі де қарастырылған.
«Алдағы 3-4 жылда кәсібімді кеңейтіп өзіміз өндіретін өнімді қазақстандық брендке айналдырсам, Шымкент қаласынан, сонан соң өзім туып-өскен Жетісай ауданынан кондитерлік цех ашсам деген ниетім бар. Бұған дейін, яғни, 2013-жылы Асықата кентінен кіші цех ашып көргенмін. Сол кездегі тәжірибемнің жоқтығынан болар бәлкім, жұмысымды ойдағыдай жүргізе алмаған болатынмын»,-деп күлген Нұрсұлтан алдағы жоспарларымен де бөлісті.
Тұтынушылардан «Карамельный», «Рафаэлло», «Вупи пай», «Молочная девушка», «Шоколадный», «Қызыл бархат», «Королевский» және «Медовый» сынды торттардың түріне жиі тапсырыс қабылдайтын кондитер жігіт айына екі рет сұраныс арқылы ақылы түрде мастер-класс өткізіп отырады.
Бауыржан НАЙМАНОВ.
yassy-tur.kz
