Түркістандық Мухая Бектұрсын қала тұрғындары үшін тоңдырылған пельмен өнімін ұсынып отыр. Жас кәсіпкер отбасылық кәсібін 2 жыл бұрын қолға алған. Айтуынша, кәсіпкер болу тек табыс табу ғана емес халыққа пайдаңды тигізе білудің өзі үлкен жетістік.
«Күніне 5-6 келі түшпара өнімін сатамын. 3 келіден жоғары тапсырыс берушілер үшін жеткізілуі тегін. 1 күнде 8 келіге дейін түшпара әзірлеймін. Бала-шағамның несібесін табу ісіне екі анам, яғни енем мен туған анам көмектеседі. Жұбайым кез келген мекен-жайға жеткізіп береді. Тұтынушылардың ұсыныс-пікірлерін ескеріп, түшпарадан бөлек манты дайындап, саудалауға көштім. Ісім ақырындап ілгерілеп келеді», – дейді Мухая Захрақызы.
Кәсіпкер «Атамакен» ҚР Ұлттық кәсіпкерлер палатасы ұйымдастырған «Бастау бизнес» жобасы бойынша 2 айлық курста дәріс алып, қайтарымсыз 505 мың теңге қаржы грантына ие болады. Қолдағы қаражатқа 3 дана тоңдыруға арналған мұздатқыш камераларын сатып алған.
Тапсырысты, WhatsApp, Instagram мессенджерлері мен Olx арқылы қабылдайды. Әлеуметтік желімен жұмыс жасау үшін арнайы мамандардың көмегімен ақылы курстарға да қатысқан-ды.
Бастаған ісін дамыту үшін шағын цех ашып, галубци жасауды қолға алуды жоспарлап отыр. Бұл әрине ел экономикасын дамыту бағытына аз ғана болсын үлес қосу жолындағы жас кәсіпкердің үлкен қадамы деуге болады.
Нұртас КЕҢЕСБЕКОВ.
