Қазіргі таңда Түркістан қаласындағы Төле би атындағы №19 және М.Пошанов атындағы №21 жалпы орта мектептері күрделі жөндеуден өткізілуде. Бүгін Түркістан қаласы адами әлеуетті дамыту бөлімінің басшысы Оразкүл Қолдасова аталған білім ошақтарында күрделі жөндеу жұмыстарының қандай деңгейде жүріп жатқанын зерделеп шықты.
— Жаңа оқу жылында оқушылар жаңарған мектепте білім алатын болады. Мердігер мекемелер өз жұмысын тиянақты атқаруда. Негізі құрылыс жұмыстары келесі жылға өтпелі болғанымен, мүмкіндігінше биылғы оқу жылына дейін аяқтау міндеті тұр. Жалпы сапалы жұмыстың нәтижесін көріп тұрмыз. Мұның барлығы түркістандық оқушылардың игілігі үшін атқарылып жатқан жұмыстар, — деді Оразкүл Шайхықызы.
Аталған білім ұяларында күрделі жөндеу тамыз айының ортасында аяқталады деп жоспарланған. Төле би атындағы №19 жалпы орта мектептің директоры Алтынбек Момбековтің айтуынша, құрылыс жұмыстарын «Kazintelgroup» мердігер мекемесі жүргізуде. Ал М.Пошанов атындағы №21 жалпы орта мектеп директоры Руслан Стамқұлов күрделі жөндеу жұмыстары 90 пайызға аяқталғанын хабарлады.
Айта кетейік, 2023-2025 жылдар аралығында Түркістан облысында 89 мектеп салынады. Ол білім ұяларында 72 мыңға жуық оқушы білім алады. Бүгінде өңірде білім ұяларының жобалары, жер телімдері, құжаттарын әзірлеу жұмысы басталуда.
Түркістан облысы адами әлеуетті дамыту басқармасының басшысы Дінислам Болатханұлының мәлімдеуінше, облыста 2023 жылы – 2, 2024 жылы – 31, 2025 жылы – 56 мектепті пайдалануға беру жоспарланып отыр. Ең көп мектеп қажеттілігі бар аудан, қалаларға тоқталсақ, Түркістан қаласында 8 мектеп бой көтереді. Сонымен бірге Келес ауданында – 8, Сауран ауданында – 9, Сайрам ауданында 12 мектеп салынбақ.
