Жезқазған қаласында байдарка мен каноэда есу спортынан жастар және ересектер арасындағы Қазақстан чемпионаты өтті. Дүбірлі сынға 12 өңірден 130-ға жуық спортшы қатысты. Спортшылар 1000, 500, 200 және 5000 метр қашықтықта сынға түсті. Қазақстан Республикасының жекелей және командалық чемпионатында Түркістан облысының спортшылары командалық есепте бірінші орынға ие болды.
Су спорты түрлерінен Түркістан облысының ОРМБЖСМ спортшылары алғашқы күннен чемпионаттың басты фавориттері болды. Жерлестеріміз әр түрлі бағдарламаларда 19 алтын, 12 күміс және 9 қола жүлдеге ие болды. Жеңімпаздарға тоқталсақ, Н.Сергеева К-1; 1000 м, К-1; 500 м, К-1; 200 м, К-1; 5000 м қашықтықтары бойынша 4 алтын медальді олжалады. Сонымен қатар К.Семеникинамен жұптасып ескек есуде де топ жарды. Чемпионатта Б.Раматулла, В.Панкратов, К.Семеникина, Е.Тютюкина, Т.Әлиханов, Д.Бахрадин, Д.Корыткина, Д.Эргашханова да алтыннан алқа тақты. Командалық екінші орын Шымкент спортшыларына бұйырса, үштікті елордалықтар қорытындылады.
Түркістан облысының үздік ескек есушілері О.Ковалева, Е.Кеңесов, С.Сергеев, Е.Синявская сынды бапкерлердің басшылығымен Азия Кубогына дайындықты бастап кетті. Бұл жарыс 29 қыркүйек пен 2 қазан аралығында Жапонияда өтеді. Осылайша Түркістан облысының спортшылары 40 медальмен топ жарды. Соңғы жылдары Түркістанда су спорты дамып келеді.
Жалпы алғанда, киелі өңірдің спорты жылдан жылға дамып келеді. Облыс орталығы мәртебесіне ие болғалы бері қалада жаңа спорт нысандары салынуда. Құдай бұйыртса, осы спорт нысандарынан келешекте облыстық, республикалық, халықаралық дүбірлі жарыстарда биік шыңнан көрінетін спортшылар шығады деп сенейік.
Түркістан облысы әкімінің баспасөз қызметі
