Шымкент қаласының әкімі М.Әйтенов «Аманат» партиясы «Жастар Рухы» жастар қанатының VI съезіне қатысқан шымкенттік делегаттармен кездесті.
Кездесуде жастар съез барысында көтерілген мәселелер мен ұсыныстар туралы баяндады. Еліміздің әр тарапынан келген белсенді жастармен тәжірибе алмасып келуге мүмкіндік берген партияға алғыстарын білдіріп, өзекті мәселелерді ортаға салды.
Қала әкімі қоғамның қозғаушы күші – жастар болғандықтан, жастарға арналған түрлі мемлекеттік бағдарламалар жүзеге асырылып жатқанын жеткізді.
— Тәуелсіздік рухымен өсіп келе жатқан бүгінгі жастар – еліміздің ертеңгі үміті, сенімді тірегі екенін нақты көрсетті. Президентіміз Қасым-Жомарт Кемелұлы Тоқаев айтып өткендей жастар үшін маңызды білім, еңбекқорлық және отаншылдық бағыттары бойынша бірқатар жұмыстар атқаруымыз қажет. Сіздерге артылар үміт пен жауапкершілік орасан. Бүгінгі жастар арасындағы негізгі мәселе болып табылатын жұмыспен қамту, отбасы құндылығы сынды бағытта жұмыс жасаудамыз. Ай сайынғы жастармен кездесу жалғаса береді. Әрдайым жалынды ойларыңыз бен идеяларыңызды қолдауға дайынбыз, — деп сөзін қорытындылады.
Естеріңізге сала кетейік, жуырда «AMANAT» партиясы Жастар қанатының кезектен тыс VI Съезінің делегаттары Зеренді жерінде бас қосқан болатын. Съездің салтанатты ашылу рәсіміне еліміздің 17 облысы мен 3 мегаполис қаласынан жас делегаттар жиналды.
Съездің алғашқы күнінде келушілерге экология бағыты бойынша ҚР экология, геология және табиғи ресурстар министрлігінің экотренері, экоамбассадоры Мариям Қасымова дәріс оқып, тәжірибесімен бөлісті.
Аталған бас қосуға Шымкент қаласынан 15 делегат қатысқан еді. Оның ішінде жастар ұйымдарының көшбасшылары, қалалық мәслихат депутаттары, ғылым және мәдениет саласының мамандары бар.
