Бүгін аудан әкімі Ұ.Сәдібеков Қарамұрт ауылдық округінің тұрғындарымен кездесті. Кездесу Орталық саябақта ашық диалог форматында өтті.
Алдымен аудан әкімі тұрғындарымен өткізген ағымдағы жылдың ІІ тоқсанындағы кездесу барысында №6 Киров атындағы жалпы орта мектебіне күрделі жөндеу жұмыстарын жүргізу, мектеп атауын ауыстыру, ауылда спорт саласын дамыту үшін 1 бірлікті қарастыру, «Кент Балдыберек» каналынан өтетін ағын су мәселесін шешу туралы көтерілген болатын. Бүгінгі таңда осы 4 мәселенің 2-уі шешімін тауып, 2 мәселе бақылауда тұрғанын түсіндірді.
Кездесу кезінде ауыл белсенділері ойларын ортаға салып, өздерінің атқарған жұмыстары мен ұсыныстарын жеткізді.
Ауылдық округінің төбе биі А.Маннанов қоғаммен өткізілетін кездесулер мен ондағы өзекті мәселелер бойынша талқыланатын тақырыптарға тоқталды. Бастысы, ауылдың жағдайына, тыныштығы мен тазалығына мән беріле отырып, көрші ауылдың ақсақалдары мен белсенділерімен бас қосу арқылы жақсы қарым-қатынас орнағанын тілге тиек етті. Ендігі кезекте, орталық Ғ.Ғулам және Жеті мама көшелерін жөндеуді, сонымен қатар кейбір көшелердің жол құрылыстарын жүргізуге қаржы қарастыруды ұсынды.
Ауыл жастарын спортттан республикалық жарыстарға дайындап, жоғары нәтиже көрсетіп жүрген бапкер И.Джаманов сөзге шығып, спортты дамыту жағынан өзінің ой-пікірін жеткізді.
Қарамұрт ауылдық округі әйелдер кеңесінің төрайымы Д.Бегалиева отбасын сақтау мәселелері, әйелдер және балалардың құқықтарын қорғау, жастар тәрбиесі жайында халыққа тұрақты түсіндірілетінін әңгімеледі.
Ауылдық жастар ұйымы төрағасының орынбасары Б.Шарипбаев тұрғындарды сапалы интернет желісімен қамту қажет екенін сөз етті. Бүгінгі таңда «LUNNY COM» және «Qazaqnet» ЖШС-тері бірігіп, елді мекендерде республиканың «Цифрлық Қазақстан» мемлекеттік бағдарламасы аясында ауыл тұрғындарының интернетке қолжетімділігі және интернет жылдамдығын арттыру мақсатында жұмыстар атқарылуда. 40 тұтынушы радиорелелік байланыс жүйесі арқылы келісімшарт негізінде сапалы интернет байланысымен қамтылды. «Qazaqnet» ЖШС-і тарапынан 10 млн. теңге көлемінде инвестиция тарту және 5-10 адамды жұмысмен қамтуды жоспарланып отыр. Осыған байланысты ауылда оптика кабельдерін көшелерге орнату үшін аудандық тұрғын үй-коммуналдық шаруашылық бөлімі тарапынан көше рұқсат беруді сұранды.
Қарамұрт ауылының бас имамы Ш.Мирзеевтің пікірінше, ауыл аумағында 2 мешіт, 2 намазхана бар. Бүгінгі таңда «Каланбаб» мешіті ғимаратын кеңейту жұмыстары жүргізілуде. Аз қамтамасыз етілген отбасыларға көрсетілген көмектермен қатар, демеушілер және тұрғындар тарапынан асар жолымен мазараттардың аумағы қоршалып, тазалық жұмыстары ұйымдастырылып, ретке келтірілді.
Мұнан бөлек, тұрғындар жолға асфальт, тас төсеу, электр жарығымен қамту, жер қойнауын пайдаланушылардың жұмыстарын қадағалау және тағы басқа маңызды мәселелерді көтерді.
Аудан әкімі және тиісті сала басшылары тарапынан сұрақтарға қатысты нақты жауаптары беріліп, талқыланған өзекті мәселелер бақылауға алынды.
Ауыл ақсақалы аудан басшыларына батасын беріп, ауылдың дамуына қосып отырған үлестері үшін алғысын жеткізді.
Сайрам ауданы әкімінің баспасөз қызметі
