Жетісай ауданында дирижер, күйші, композитор Бөрі Исаның шығармашылығына арналған «Жетісайдың Бөрі Исасы» сыр-сұхбат кеші өткізілді.
2022 жылдың 27 шілде күні Түркістан облыстық тарихи-өлкетану музейінің бастамасымен Жетісай аудандық орталық кітапханасының ұйымдастыруымен Қазақстан Республикасының мәдениет қайраткері, Қазақстан композиторлар Одағының мүшесі, профессор, Жетісайдың Нұрғисасы атанған дирижер, күйші, композитор Бөрі Исаның шығармашылығына арналған «Жетісайдың Бөрі Исасы» атты сыр-сұхбат кеші өткізілді. Іс-шарамыздың басты мақсаты қазақстандық патриотизм негізінде табысты тұлғаны қалыптастыру тәсілі ретінде кітап пен оқуға жастардың назарын аудару, өлкеміздің табысты адамдарының шыңдалуына арқау болған кітаптармен танысу, жастардың бойында өзін-өзі дамыту бойынша жауапкершілікті қалыптастыру болып табылады. Мектеп оқушылары Бөрі Исаны күймен қарсы алды. «Балбырауын», «Тәуелсіздік», «Құстар қайтып барады» күйлері орындалды. Іс-шара «ZOOM» платформасында өткізілді. Алғашқы сөз кезегін Түркістан облыстық тарихи- өлкетану музейінің ғылыми әдістемелік бөлімінің ғылыми қызметкері Нысантаева Ақбота сөйлеп, іс-шараны ашты. Бөрі Иса ағамыздың өмірбаянына тоқталып өтті. Келесі сөз кезегін іс-шара жүргізушісі, аудандық орталық балалар кітапханасының меңгерушісі Шоматова Назира алып, сыр – сұхбат кешін одан ары қарай жалғастырды. Іс-шара барысында Бөрі Иса ағамыздың өмірі мен шығармашылығына арналған бейнеслайд көрсетілді. Кітапхана қызметкері Елтон Нұрлыбек «Жақсы адамдарым» әнін орындады. Кеш қонақтары: Жетісай ауданының азаматы, қоғам белсендісі Зиядин Ахмет, №6 Бауыржан Момышұлы атындағы мектеп-гимназиясының тәрбие жөніндегі орынбасары Сариева Сәрсенкүл Бөрі Иса туралы жылы лебіздерін айтты. Кітапхана оқырмандары ағамызға бірнеше сұрақтар қойды. Бөрі Иса ағамыз «Сағыныш» күйін орындады. Кешті аудандық ОКЖ басшысы Жунисова Асима Ермекбайқызы қорытындылап, Бөрі Иса ағамызға алғысын білдірді. Кеш соңында Бөрі Иса кітапхана ұжымына, қонақтарға, өнерпаздарға ақ батасын берді.
