Түркістан облысының қоғамдық даму басқармасы «Қоғамдық келісім» КММ Жетісай аудандық филиалының ұйымдастыруымен Жетісай ауданының Адами әлеуетті дамыту бөліміне қарасты №28 Х.Доспанова атындағы жалпы орта мектебінде, мектеп оқушылары арасында асфальтқа сурет салудан байқау болып өтті.
Елорда – Нұр-Сұлтан қаласының 24 жылдығы және 2022 жыл Балалар жылына орай ұйымдастырылған байқауға Түркістан облысының қоғамдық даму басқармасы «Қоғамдық келісім» КММ Жетісай аудандық филиалының басшысы Д.Мырзамуратов және аталмыш мектептің Сызу және бейнелеу пәнінің мұғалімі С.Турсунов және мектеп оқушылары қатысты.
-Бүгінгі өткізіліп жатқан іс-шараның мақсаты — балалардың ой-өрісін дамыту, олардың Отанға,туған жерге деген суйіспеншілігін арттыру, патриоттық сезімдерін ояту болып табылады. Бүгінгі сайыс арқылы оқушыларымыз Елордамы-Нұр-Сұлтан қаласына өз өнерлері арқылы тарту жасамақ. Барлық қатысушыларға сәттілік тілеймін. Қиялдарың ұшқыр, қаламдарың жүйрік болсын! – деді С. Турсунов.
Нұр-Сұлтан қаласын тек теледидар мен фотосуреттерден ғана көрген қатысушылар барынша суреттерге жан бітіруге тырысты. «Ел жүрегі – Нұр-Сұлтан» тақырыбында өткен сурет салу байқауына 15-ке тарта бүлдіршін қатысып, өзара мықтыларды анықтады. Оқушылардың сурет салу шеберлігі мен тақырыпқа сәйкестігі басты назарға алынған байқаудың қорытындысы бойынша жүлделі ІІІ орынды Турсунова Зилола мен Дадаева Зарина иеленсе, ІІ орын Індемес Ақдидарға бұйырды. Ал, І орынды Султанова Зарифа қанжығасына байлады. Байқау жеңімпаздары мен барлық қатысушылар дипломдармен марапатталды.
