Кентау қаласында қоқыс жәшіктері жаңартылады. Бүгінгі күні қаладағы халық көп шоғырланатын басты көшелер мен аллеяларға, саябақтар алаңдарына қою жұмыстары басталды. Бұл туралы Түркістан облысы әкімінің баспасөз қызметі мәлімдеді.
Тұрмыстық қатты қалдықтарға арналған жәшіктер заманауи үлгіге сай ыңғайлы жасалынған. Жаңа қоқыс жәшігі үш бөліктен құралған. Яғни шыны ыдыстары, пластикалық қалдықтар, тұрмыстық заттардың қалдықтары бөлек салынады.
Әрбір қоқыс жәшігіндегі қалдықтарды күн сайын тазалық мекемесі тазалап отырады. Үш бөліктен тұратын қоқыс жәшігінен қалада 200-ін орналастыру, ал қарапайым кіші қоқыс жәшіктен 100-ін қою жоспарланған.
Айта кетейік, қалада қоқыс жәшіктерін орнату және жаңарту мәселесі тұрғындар тарапынан көтеріліп келген. Қала әкімі Рашид Аюпов тұрғындармен кездесуінде бұл мәселені шешу жағы қарастырылып, тиісті шаралар жүзеге асырылатынын атап өткен болатын.
Кентау қаласында тазалық жұмыстары басты орында.Моноқала осылайша еліміздегі ең ажарлы қалалар қатарында. Жауапты жұмысты «Тазалық Кентау» ЖШС-і мен «Интеко Групп» ЖШС-і жүргізеді. Кентау қаласында санитарлық тазалық жұмыстары қарқынды түрде жүруде. Көшелер күнде сыпырылып , арнайы қоқыс алаңшалары дер кезінде тазаланып тұрады. Таң қылаң бере жұмысқа кірісетін «Интеко Групп» ЖШС-нің еншісінде 54 көше кіреді. Олар топқа бөлініп қала көшелерін қоқыстан тазартып, тұрғындарға жайлы жағдай сыйлайды. Серіктестік қызметкерлері жауапты жұмысты әліде жандандырмақ ниетте. Осы мақсатта көп қабатты үйлердің ауласы тағы да жаңа қоқыс алаңшалармен толығатын болады. Ал, «Тазалық Кентау» ЖШС-і контейнерлерді қоқыстан тазартып, дезинфекция жұмыстарын жүргізуді мойнына алып отыр.
