Теміртау қаласында академиялық ескек есуден Қазақстанның командалық чемпионаты өтті. Жарысқа еліміздің 4 аймағының ең үздік 146 спортшысы қатысты.
Түркістан облысы құрамасындағы су спорты түрлерінен ОРМБЖСМ спортшылары сарапқа салынған 16 алтын медалдің 8-ін жеңіп алды. Сонымен қатар 5 күміс және 5 қола жүлде еншіледі. Атап айтсақ, Яковлев Владислав, Чернухин Иван, Цатышаев Байсангур, Афанасьев Александр, Керімбек Әділет, Бекбембетов Қуаныш
Фаритов Руслан, Галкин Владислав сынды жігіттер түрлі сайыс бойынша чемпион болса, әйелдер арасында Волкодавова Валентина мен
Носкова Екатерина топ жарды.
Жалпыкомандалық есепте Түркістан өңірінің өрендері 8 алтын, 5 күміс, 5 қола олжалады.
Жеңімпаздарды білікті бапкерлер — Михаил Ковалев, Руслан Фаритов, Артем Бекмачев және Станислав Дьяченко даярлады.
Қазақстан чемпионатына еліміздің үш облысы мен бір қаласынан спортшылар қатысты. Атап айтар болсақ, Қарағанды облысы, Батыс Қазақстан облысы, Түркістан облысы, сондай-ақ, Астана қаласының ескек есушілері өзара бақ сынады.
«Қазақстан біріншілігіне еліміздің төрт аймағынан 100-ден аса спортшылар қатысты. Осы турнир арқылы Жазғы Азия ойындарына қатысатын ұлттық құрама мүшелері таңдалып, спортшылардың дайындығы пысықталады. Сонымен қатар, осы турнир арқылы академиялық ескек есуден Қазақстан ұлттық құрамасына үміткер спортшыларды бақылайтын боламыз. Спортшылар ел біріншілігінде 2 километрге 14 олимпиадалық бағдарлама бойынша жарысты», — деді ескек есуден мемлекеттік жаттықтырушы Александр Усачев.
Еске сала кетейік, Жазғы Азия ойындары Джакартада (Индонезия) 18 тамыз бен 2 қыркүйек аралығында өтеді.
