23 маусым — Мемлекеттік қызметшілер күніне орай Түркістан облысы әкімдігінің басқарма басшыларына қоғаммен байланыс және дағдарыс кезеңіндегі коммуникация тақырыбында шеберлік сабағы өтті. Спикер ретінде облыс әкімінің орынбасары Сакен Қалқаманов баяндама жасап, Қазақстан және әлемдегі белгілі тұлғалардың БАҚ тілшілерімен және жұртшылықпен сұхбат барысында жіберген кемшіліктері, елмен кері байланыс жасау бойынша әңгіме өрбітті.
— Ақпараттар ағыны секунд сайын жаңарып отыратын XXI ғасырда әр мемлекеттік қызметші өз саласы бойынша кез келген сұраққа сүрінбей жауап беріп, ашықтықтан қашпау керек. Бұл — мемлекеттік қызметті таңдаған кез келген маманның міндеті, — деген Сәкен Амангелдіұлы мемлекеттік қызметшінің мәртебесі, оның көпшілік алдында өзін-өзі ұстауы, дағдарыс жайында коммуникация жүйесін реттеу, сөз саптауына дейін жіктеп, түрлі оқиғаларға талдау жасады.
Сондай-ақ дәріске қатысушыларға кез келген дағдарыс кезінде ресми ақпаратты шұғыл тарату, қоғамда тұрақтылықты сақтау алгоритміне сәйкес жұмыс жүргізу жүйесі түсіндірілді.
Түркістан облысының әкімі Өмірзақ Шөкеев Мемлекеттік қызметшілерді мерекемен құттықтады.
Құрметті мемлекеттік қызметшілер!
Қадірлі әріптестер!
Сіздерді 23 маусым – Мемлекеттік қызметшілер күнімен шын жүректен құттықтаймын.
Мемлекеттік қызмет – елдің сенімі, халықтың аманаты. Аманатқа адал болу, мемлекеттік қызметшіге тән болмысты сақтап, ұлтқа қызмет ету – қасиетті борышымыз. Сондықтан сала өкілдеріне тұтас ел тарапынан үлкен жауапкершілік жүктеліп отыр. Бұл ретте Түркістан облысының мемлекеттік қызметшілері өздеріне жүктелген міндетті абыроймен атқарып келеді деп есептеймін. Күрделі де жауапты салада адал еңбек етіп, елдің дамуына үлес қосып жүргендеріңіз үшін алғысымды білдіремін. Баршаңызды кәсіби мерекемен құттықтай отырып, әрбіріңізге және отбасыларыңызға амандық, денсаулық, шаттық, бақыт, береке тілеймін! Мереке құтты болсын, әріптестер!
Өмірзақ Шөкеев,
Түркістан облысының әкімі
