Түркістандықтар мемлекеттік маңызы бар саяси науқанға қатысып, Жаңа Қазақстан құру жолдындағы өз таңдауларын жасады.
Алдын ала мәліметтерге сүйенсек, сағат кешкі 22.00-ғы мәлімет бойынша Түркістан өңірінде сайлаушылардың 80,66%-ы өз таңдауын жасап үлгерді. Бұл – республикадағы ең жоғары көрсеткіш.
Екі миллионнан астам тұрғыны бар өңірде 1,1 млн. астам сайлаушы тіркелген. Оларға 914 референдум учаскесі әзірленген.
Өңірде референдумға дайындық жоғары деңгейде жүргізілді. Облыстық қоғамдық штаб құрылып, халықпен 2864 кездесу өткізілді, 288 мыңнан астам тұрғын қамтылды. Сонымен бірге «Amanat» партиясы жанынан құрылған штаб та түсіндіру, үгіт-насихат жұмысын жүргізді. Өңірдегі 914 сайлау учаскелерінде 6500-ге жуық бақылаушы референдумның әділ өтуін бақылады. Референдум учаскелерінде келеңсіз жағдай орын алмады. Ал Түркістан облысы, Кентау қаласының тұрғыны, ҰОС ардагері Бадан Туребаев өз шаңырағында референдумдағы таңдауын жасады. «Өскелең ұрпақтың жарқын болашағына үлкен өзгеріс беретін маңызды сәтте менің де таңдауым маңызды», дейді ақсақал. Ардагер Бадан Туребаев 1924 жылдың 13 қарашасында Түркістан облысында дүниеге келген. 1944 жылы 15 қазанда әскер қатарына шақырылды. 4 ай әскери дайындықтан өткен соң Бельарус майданында жорық жолы басталып, ауыр шайқаста ерекше ерлігімен көзге түскен. Сондағы жанқиярлығы ескеріліп «Ерлігі үшін» медальімен марапатталған. Жорық жолы Берлинге дейін жалғасты.
