Биыл мемлекеттік сатып алу бағытында жүргізілген мониторинг бойынша 3 ай қорытындысында 103 075 054 теңге үнемделді. Бұл туралы бүгінгі брифингте ҚР Сыбайлас жемқорлыққа қарсы іс-қимыл агенттігі Түркістан облысы бойынша департаменті басшысының бірінші орынбасары Нұрдәулет Сәмет мәлімдеді.
«Жыл басынан бері 35 сыбайлас жемқорлық қылмысы тіркелген. Оның ішінде пара алу бойынша 17, пара беру бойынша 4 қылмыстық іс дерегі тіркелген. Жемқорлық қылмыстары білім беру саласы мен тұрғын үй-коммуналдық шаруашылық саласында көп анықталған. Білім беру саласында еңбек заңнамасын бұза отырып пара алудың қалыптасқан сыбайлас жемқорлық схемасы мен білім беру мекемелерінде ақша жинау тәуекелдеріне қатысты фактілер тіркелген», — деді Нұрдәулет Ілиясұлы.
Департамент тарапынан ағымдағы жылы қоғам белсенділерімен бірлесе отырып 87 профилактикалы іс-шара жүргізілген. Шараға 9 700 адам қатысып, әлеуметтік маңызы бар салалар мен мақсатты топтар қамтылған.
Түркістан облысының Өңірлік коммуникациялар қызметі
