Шымкент гарнизонындағы әуе шабуылына қарсы қорғаныс бригадасының әскери қызметшілері мен В. Терещкова атындағы №31 жалпы орта мектебінің «Жас зымыраншы» әскери-патриоттық сыныбының оқушылары Тәуелсіздіктің 30 жылдығы қарсаңында Қазығұрт шыңын бағындыру үшін біркүндік саяхатқа шықты.
Шараның басты мақсаты – өскелең ұрпақты патриотты, рухты етіп тәрбиелеу және салауатты өмір салтын насихаттау болып табылады.
Таулы өлкеге саяхатты асыға және қызығушылықпен күткен оқушылар шың басына 2 сағат уақыт көлемінде жаяу жүріп, биіктігі 1768 метрді құрайтын Қазығұрт шыңына шығып, Қазақстан Тәуелсіздігінің 30 жылдығы құрметіне еліміздің көк туын тікті.
Таулы аймақта оқыс жағдайлардың алдын алу мақсатында медицина қызметкерлері жұмылдырылып, арнайы нұсқаушы әскери қызметкерлер бағыт-бағдар көрсетіп жүрді. Сондай-ақ, тау етегінде оқушыларға арналған шатырлар құрылды.
–Мен үшін бүгінгі күн өте әсерлі және ерекше болды. Тау шыңына шығып, табиғатымыздың сұлулығына тамсана қарадым. Қазығұрт тауының тарихымен, аңыз әңгімелерімен таныс болдық. Бізге осындай керемет көңіл-күй сыйлаған әскери ағаларымызға алғысымыз шексіз, – дейді Азиз Сарыбек.
Айта кетсек, Қазығұрт тауы – Түркістан облысы Қазығұрт ауданының орталығынан 20 шақырым жерде орналасқан тау шыңы. Аңыз бойынша, Нұх пайғамбардың кемесі осы таудың басында тоқтаған. Осы сияқты аңыздар қазақ халқынан басқа көптеген ежелгі халықтардың мифологиясында кездеседі.
2 сыныпты сержант Мақсат ЖАҚСЫБЕК
Шымкент гарнизонының баспасөз қызметі
