Түркістан облысында жаңадан құрылған Сауран ауданы әкімдігінің қызметкерлері аудан құрылғалы бері бір тиын жалақы алмаған. Яғни мамандар үш айдан бері тегін жұмыс істеп келеді.
«13KZ» ақпараттық агенттігінің тілшілері мәселенің анық-қанығына көз жеткізу үшін аудан әкімі Ғани Рысбековке хабарласқан еді. Аудан басшысы мәселенің барын жоққа шығармады. Ол мұның себебін жаңадан құрылған ауданның кейбір құжаттарының толық рәсімделіп бітпегенімен байланыстырды.
ҒАНИ РЫСБЕКОВ
Сауран ауданының әкімі
«Қаржы министрлігі казначейство номерін беру керек. Сол номерді күтіп отырмыз. Оның барлығы Әділет министрлігі бар, Экономика министрлігі бар, Қаржы министрлігі бар соның бәрінен келісімінен өтеді. Енді аудан құру оңай емес қой. Күнделікті қызметкерлерге оның бәрін айтып, түсіндіріп отырмыз. Август айында 20-нан кейін жалақылары беріледі. Айдың аяғында беріледі, есеп айырысу 25-не қарай ғой. Осы айда айлық жалақыларын алады»
Ғани Құрмашұлы қызметкерлердің жалақысы тамыз айының аяғына дейін беріледі деп сендірді. Демек, жергілікті шенеуніктерге тағы біраз сабыр сақтай тұруға тура келеді.
Естеріңізге сала кетейік, 2021 жылдың 15 наурыз айында ҚР Президенті Қ.Тоқаевтың жарлығымен Түркістан облысында жаңадан Сауран ауданы құрылған болатын. Аудан 12 ауылдық окургтен тұрады.
