Шымшаһарда көктемнің шуақты күндерінен бастау алған сенбілік жұмыстары жалғасын табуда. Бұл жолы қаланы қоқыстан тазартуға «Жасыл ел» еңбек жасақтары өз үлестерін қосып жатыр. 200-ге жуық жас бүгін Абай ауданы әкімі Бұхарбай Пармановпен бірге аудандағы көпқабатты тұрғын үйдің аулалары мен саябақтарды, көшелерді күл-қоқыстан тазартуға атсалысты.
Іске кіріскендер тазалықты тапсырма берілгендіктен емес, өз қалаларының тазалығына, гүлденуіне арнайы уақыт бөлінгеніне ризашылықпен атқарып жатты. Ал аудан басшысы сенбіліктің жастардың бойындағы патриоттық сезімдерін оятуда маңызы зор екенін атап өтті.
– Сенбілік — халықты игілікті іске шақыру. Әр адам өз үйін, ауласын таза ұстаса қаланың тазалығы мен көркіне көрік қосар еді. Сенбіліктің жастарға пайдасы зор. Олар сенбілікке шығып, талдарды әктеп, гүлдерге су құйып, айналаны сыпырып, қоқыстарды жинау арқылы қоғамға басқаша көзбен қарайтын болады. Барлығы еңбекпен жасалатын дүние екенін ұғынады. Қала ортақ мекеніміз. Деніміздің саулығы шаһардың тазалығына тікелей байланысты. Белсенділік танытқан жастарға айтар алғысым шексіз. Осылайша, тазалық жанашырлары қоқыс қалдықтарын шығарып, ортақ мекеннің көркеюіне өз үлестерін қосып жатқаны қуантады, — дейді Бұхарбай Парманов.
Жалпы, бағдарламаның негiзгi мақсаты – жалынды жастардың көмегімен қаланың күл-қоқыстан тазарту. Сонымен қатар, жастардың Отанға, жерге деген махаббатын, патриоттық сезiмiн ояту. Ең бастысы – жастардың бос уақытын еңбекпен, тиімді өткізуге баулу.
– Екі айлық бағдарламаға жұмысшы топ құрамына 1200 жас қабылданып, қарқынды жұмыс жасауда. «Жасыл елдіктер» қатарын негізінен студенттер мен мектеп оқушылары құрайды. Олар ақылы негізде осы жұмыстарды атқарып жатыр. Бағдарлама аясында 16 мен 29 жас аралығындағы жастар қабылданды. Сонымен қатар, белсене қатысқан жастарға жыл қорытындысы бойынша арнайы сыйлықтар табыстау жоспарлануда, — дейді «Жасыл ел» еңбек жасақтарының жоба үйлестірушісі Абай Андабаев.
Айта кетейік, сенбілік жұмыстары демалыс күндері Еңбекші ауданында жалғасады.
