ҚР тәуелсіздігінің 30 жылдығы аясындағы іс-шаралар үшінші мегаполисте кешенді жоспарға сай жүзеге асырылуда. Кешенді жоспарды қала әкімі Мұрат Әйтенов бекіткен.
Бұл туралы қалалық әкімдіктің ақпараттық-коммуникация орталығында өткен брифингте айтылды.
Шымкент қалалық ішкі саясат және жастар ісі жөніндегі басқарма басшысының орынбасары Бексұлтан Әділхановтың айтуынша, тәуелсіздіктің 30 жылдығы аясында жыл басынан бері әр айға бөлек атау беріліп, кең көлемде аталып келеді.
— Кешенді жоспар 109 тармақтан тұрады. Жыл басынан бері 100-ден аса іс-шара ұйымдастырылды. Оның ішінде ең бастылары — ресми түрде ашылған Shymqala этноқалашығы, елімізде ең алғаш болып Шымкентте өткізілген «Жастар лигасы» спорт сайысын, Әз-Наурыз мерекесін әр күнін өз атауымен 10 күн бойы атап өтуді, жаңарған 3 кітапхананың ашылуын, Елорда күні қарсаңында 11 инвестициялық жобаның іске қосылуын айтуға болады, — деді Бексұлтан Ержанұлы.
Мерекелік іс-шаралар екінші жартыжылдықта да жоспарға сай өткізіледі. Атап айтқанда Отбасы күніне орай мерейлі отбасылар слеті ұйымдастырылып, 7 жаңа өндіріс орнын ашу, кітапхана және 4 мектепті ел игілігіне беру, 2400-ден аса пәтер кілтін табыстау жоспарлануда.
